NATO Ukraynaya hərbi kontingent göndərilməsini müzakirə etmir
NATO Hərbi Komitəsinin rəhbəri Cuzeppe Kavo Draqone bildirib ki, alyans daxilində Ukraynaya təhlükəsizlik zəmanəti üçün hərbi qüvvələrin göndərilməsi məsələsi gündəmə gətirilməyib.
Crossmedia.az xarici mediaya istinadən bildirir ki, o, bu mövzunun siyasi xarakter daşıdığını və Moskva ilə aparılan danışıqlar çərçivəsində müzakirə oluna biləcəyini qeyd edib.
Draqonenin sözlərinə görə, bəzi ölkələr tərəfindən toxunulan ideya hələ “embrional vəziyyətdədir” və bir çox suallar açıq qalır: sazişlərin pozulub-pozulmadığını kim müəyyən edəcək, missiyanın çərçivəsini kim hazırlayacaq, hansı ərazilər nəzarətdə saxlanılacaq və hərbçilər yalnız müşahidə edəcək, yoxsa müdafiə funksiyası da daşıyacaqlar?
O, həmçinin vurğulayıb ki, NATO-nun əsas prioriteti üzv dövlətlərin vətəndaşlarının təhlükəsizliyini qorumaqdır. Bununla yanaşı, Draqone alyansın Kiyevə dəstəyinin tam davam edəcəyini təsdiqləyib.
Zəhra Ağayeva
15:13 23.08.2025
Oxunuş sayı: 790
