“Ən böyük motivasiyam - Vətəni sevməyim və Azərbaycanlı olmağımla qürur duymağımdır” – Müsahibə

Elmi nailiyyəti, beynəlxalq miqyasda aktiv ictimai fəaliyyəti ilə seçilən həmvətənlərimizdən biri də Səfərova Günel Sabir qızıdır. O, həm akademik sahədə, həm də diaspor və mədəniyyət fəaliyyəti istiqamətində uğurlu layihələrə imza ataraq Azərbaycanın adını ölkə hüdudlarından kənarda tanıdır.

Zəngilanda anadan olan Günel Səfərova Bakıdakı orta məktəbdə orta təhsil, Azərbaycan Dillər Universitetində ali təhsil alan azərbaycanlı alim və ictimai xadimdir. O, Fransada magistr və doktorantura pillələrini fərqlənmə diplomları ilə bitirib. 2019-cu ildə Paris-Saclay Universitetində iqtisad üzrə fəlsəfə doktoru elmi dərəcəsi alan Səfərova hazırda Versal Universitetində elmi işçi, beynəlxalq “Onepoint” konsaltinq şirkətində isə menecer-konsultant kimi fəaliyyət göstərir.

Elm, təhsil ilə yanaşı, ictimai sahədə də fəallıq göstərən Səfərova 2018-ci ildə Fransa-Azərbaycan Dialoqu Assosiasiyasını, 2020-ci ildə isə “Alim” elmi təşkilatını təsis edib. Onun rəhbərliyi ilə mədəniyyət, elm və maarifləndirmə istiqamətində çoxsaylı layihələr reallaşdırılıb, Fransa ictimaiyyətinə Azərbaycan həqiqətlərinin çatdırılmasında mühüm işlər görülüb. Hazırda o, həm akademik, həm də ictimai fəaliyyətini Fransada uğurla davam etdirir.

Fransada yaşayan, çalışan diaspor rəhbəri Günel Səfərova Crossmedia.az-a geniş müsahibə verib.

Müsahibə zamanı o, Fransa və ABŞ universitetlərində qazandığı pedaqoji təcrübələrdən, Fransa-Azərbaycan Dialoqu Assosiasiyasının yaradılma ideyasından və bu təşkilatın mədəniyyətlərarası körpü rolundan danışdı. Müsahibimiz həmçinin xaricdə Azərbaycanı təmsil etməyin məsuliyyətindən də söz açıb.

-Fransa və ABŞ universitetlərində dərs demək təcrübəniz sizə hansı elmi və pedaqoji bacarıqlar qazandırdı?

-Fransa və ABŞ universitetlərində dərs demək mənim üçün təkcə akademik bir fəaliyyət deyil, həm də intellektual üfüqlərimi genişləndirən vacib bir həyat məktəbi oldu. 

ABŞ-ın Corctaun (Georgetown University) universitetində keçdiyim pedaqoji yol mənə tələbələrdə yaradıcılıq və sərbəst düşünmə azadlığını təşviq etməyin vacibliyini göstərdi. Orada mühazirə təkyönlü ötürülən məlumat sessiyasından ibarət deyil, daha çox fikir mübadiləsi və tədqiqat əsaslı öyrənmə platformasıdır. Orada  universitetlərdə tədqiqat və praktikanın paralel aparılması və hər bir tələbənin fərdi potensialının üzə çıxarılmasına çalışmaq daha çox diqqətimi çəkdi.

Fransa universitetlərində isə sistemli elmi yanaşmanın və strukturlu tədrisin necə mühüm olduğunu gördüm. Burada ənənəvi elmi araşdırma metodikası ilə  müasir yanaşmanın harmonik şəkildə birləşirdirilməsinin şahidi oldum. 

Bununla yanaşı, həm ABŞ, həm də Fransada sürətlə inkişaf edən süni intellekt (AI) texnologiyalarının təhsildə tətbiqi təcrübələrini yaxından izləyirəm. ABŞ universitetlərində süni intellekt əsasən fərdiləşdirilmiş öyrənmə və tələbəyə uyğun tədris materiallarının hazırlanmasında istifadə olunur. Fransada isə, süni intellekt öncəliklə tədris prosesinin optimallaşdırılması və tələbə nailiyyətlərinin izlənməsində işə yarayır. 

Bu iki fərqli təcrübə mənə göstərdi ki, ən effektiv pedaqoji yanaşma – tələbəyə həm sərbəst düşünmə azadlığı, həm də elmi mərhələləri sistemli keçmək vərdişi qazandırmaqdır. Dərslərimdə həmçinin tələbələrlə AI-ın qabaqcıl imkanlarını, gələcək karyeralarında bu yeniliklərə necə hazır olmağın yollarını müzakirə edirik.

Hal-hazırda həm Azerbaycanda ADA Universitetində, həm də Fransada Paris-Saclay Universitetində saathesabı dərs deyirəm. Auditoriyam əsasən magistr və MBA tələbələrindən ibarətdir. Bu tələbə qrupları ilə işləmək, məndən yalnız nəzəri bilikləri deyil, eyni zamanda real biznes və idarəetmə təcrübəsini, fərqli təhsil sistemlərindən qazandığım yanaşmaları sintez edib ötürməyi tələb edir. Ən çox diqqət yetirdiyim məqamlardan biri, tələbələrimdə “out of the box” düşüncəni – yəni standartlardan kənar, yaradıcı baxış bucağını inkişaf etdirməkdir. Mənim fikrimcə, bu gün beynəlxalq arenada uğur qazanmaq üçün yalnız qaydaları bilmək deyil, onları fərqli kontekstlərdə tətbiq edə bilmək əsasdır. İstər ADA-da, istərsə də Paris-Saclay-da dərsdə tələbələri real problemləri fərqli baxışlardan analiz etməyə, innovativ həll yolları tapmağa təşviq edirəm.

-Fransa-Azərbaycan Dialoqu Assosiasiyasını yaratmaq ideyası necə formalaşdı? Bu təşəbbüsün cəmiyyətə təsirini necə qiymətləndirirsiniz?

-Fransa-Azərbaycan Dialoqu Assosiasiyası bizim üçün sadəcə bir təşkilat deyil, həm mədəni, həm də mənəvi körpü rolunu oynayan platformadır. Bu ideya mənim və Fransada Azərbaycan diasporunun yaradıcılarından biri olan Aytən Muradovanın uzun illər davam edən müşahidə və təcrübələrimizin nəticəsi olaraq formalaşdı. 

Biz gördük ki, fransız cəmiyyəti Azərbaycanı daha yaxından tanımaqda maraqlıdır. Məqsədimiz mədəniyyət və elm körpüləri qurmaq, qarşılıqlı anlaşmanı gücləndirmək, stereotipləri aradan qaldırmaq idi. İndiyə qədər keçirdiyimiz mədəni tədbirlər, elmi konfranslar və sərgilər təkcə fransızların, azərbaycanlı icma ilə yaxınlaşması deyil, eyni zamanda azərbaycan icması arasında da yaxınlaşmağa zəmin yaratdı.

Mən bu təşəbbüsün təsirini insanların münasibətindəki mehribanlıqda, ortaq layihələrdə və yaranan dostluqlarda bariz şəkildə görürəm.

Assosiasiyanın rəhbərliyində Azərbaycan incəsənət tarixində iz qoymuş Hacıbəyli nəslinin nümayəndəsi, eləcə də Fransanın tanınmış mədəni-siyasi icmasının fəal simaları yer alır. Üzvlərimiz isə əsasən Azərbaycanı sevən fransız dostlarımız və Fransada yaşayan müxtəlif ölkələrdən olan xaricilərdir. Onların hər biri bu körpünün möhkəmlənməsinə öz töhfəsini verir.

Tədbirlərimizi planlaşdırarkən biz Azərbaycanda hər il qeyd olunan əlamətdar tarix və mövzuları nəzərə alırıq. Xüsusilə yadda qalan layihələrdən bəzilərinə misal çəksəm: Üzeyir Hacıbəylinin ad gününə həsr olunmuş veriliş, Azərbaycan qadınlarına səsvermə hüququnun verilməsinin 100 illiyi münasibətilə keçirilən konsert və sərgi, eləcə də ölkəmizin mədəni irsini tanıdan İRS jurnalının yubileyinə həsr olunmuş təqdimat, dünyaca məhşur MasterChef jurnalında Azərbaycan mətbəxinə həsr olunmuş nömrənin ərsəyə gəlməsi və bu kimi tədbirləri misal gətirə bilərəm. Bu tədbirlərdə biz təkcə Azərbaycan mədəniyyətini təqdim etmir, həm də onun tarixini, dəyərlərini və müasir inkişafını iştirakçılara çatdırırıq. Fransa-Azərbaycan Dialoqu Assosiasiyasının ən uğurlu layihələrindən biri Parisdə “Xurşidbanu Natəvan adına həftəsonu Azərbaycan dili məktəbi”nin ərsəyə gəlməsidir. Diasporla iş üzrə Dövlət Komitəsi və Parisdəki Səfirliyimizin dəstəyi ilə Paris və Parisətrafı şəhərlərdə yaşayan Azərbaycan əsilli uşaqlara doğma dilimizi, mədəniyyətimizi, musiqimizi tədris etməkdən qürur duyuruq. Müəllimlərimiz Əsmər Nərimanbəyova, Ağarəhim Quliyev və Vüsalə Əliyeva məktəbin fəaliyyətində çox məsuliyyətli və həvəslə iştirak edirlər. Bizim üçün xüsusi ilham mənbəyi isə Azərbaycan Prezidentinin həyata keçirdiyi uzaqgörən siyasət və istər ölkədaxili, istərsə də beynəlxalq arenadakı təşəbbüsləridir. Buna nümunə olaraq, 08 avqust 2025-ci ildə Vaşinqtonda imzalanan Birgə Bəyanatı qeyd edə bilərəm. Bu sənəd yalnız diplomatik uğur deyil, həm də ölkəmizin gələcək inkişaf kursunun parlaq göstəricisidir. Bu kimi strateji addımlar bizə də Assosiasiyanın fəaliyyətində daha geniş miqyaslı və uzunmüddətli məqsədlər müəyyənləşdirmək üçün güclü motivasiya verir.

Bizim məqsədimiz aydındır – Azərbaycanı Fransada və daha geniş beynəlxalq məkanda həm mədəniyyət, həm elm, həm də humanitar dəyərlər baxımından tanıtmaq və bu prosesi qarşılıqlı anlayış, dostluq və əməkdaşlıq ruhunda davam etdirmək.

-Fransadakı elmi və ictimai təşkilatlarda Azərbaycanı təmsil etmək sizin üçün hansı məsuliyyət və motivasiyalar yaradır?

-Vətəndən kənarda Azərbaycanın təmsilçisi olmaq mənim üçün həm böyük şərəf, həm də son dərəcə ciddi məsuliyyətdir. Unutmaq lazım deyil ki, adımız, soyadımız, davranışımız və fəaliyyətimiz xaricdə çox vaxt ölkəmiz haqqında ilk təəssüratı formalaşdırır. Buna görə öz sahəmdə daim üzərimdə işləmək, peşəkarlığımı artırmaq və işimdə mükəmməl nəticələr qazanmaq mənim üçün təkcə şəxsi uğur deyil, həm də Azərbaycan adına hörmət qazandırmaq deməkdir.

Mümkün olduqca dərslərimdə tələbələrimə Azərbaycanın tarixindən, mədəniyyətindən, coğrafiyasından və müasir inkişafından danışmağa çalışıram. Bu, bəzən mühazirə mövzusu ilə birbaşa, bəzən isə dolayısı əlaqəli olur. Lakin hər dəfə tələbələrimin və həmkarlarımın ölkəmiz haqqında daha çox bilgi əldə etdiyini və maraqlarının artdığını görmək mənim üçün böyük qürurdur.

Həmçinin, çalışdığım şirkətdə Azərbaycanın əlamətdar günlərini — məsələn, dövlət bayramlarını, mədəniyyətimiz və tariximiz üçün önəmli olan ildönümlərini — xatırlatmağa və iş yoldaşlarımla paylaşmağa xüsusi önəm verirəm. Bu, kiçik görünən, amma uzunmüddətli perspektivdə əməkdaşlıq və dostluq münasibətlərini gücləndirən addımlardır.

Bütün bunların arxasında dayanan ən böyük motivasiya isə sadədir - Vətəni sevmək və Azərbaycanlı olmağımla qürur duymaq. Bu sevgi mənim üçün sadəcə bir hiss deyil, eyni zamanda hər addımda məsuliyyət yaradan daxili gücdür. Həmişə çalışıram ki, gördüyüm işlər, və həyata keçirdiyim layihələr ölkəmə layiq və onu tanıdan nümunələr olsun.

-Gənclərimizə nələri tövsiyə edərdiniz ki, beynəlxalq arenada daha təsirli olsunlar?

-İlk növbədə hər zaman qeyd edirəm ki, gənclərimiz seçdikləri sahədən asılı olmayaraq hər bir işdə mükəmməlliyə çalışmalıdırlar. Əgər hər birimiz öz peşəmizi, təhsilimizi və fəaliyyətimizi sevgi və məsuliyyətlə icra etsək, bu elə şəxsi uğurun özüllərindən biridir. Gənclərimizə tövsiyə edərdim ki, daim öz üzərində işləsinlər, yeni bilik və bacarıqları mənimsəsinlər, innovasiyalara, texnologiyalara və dəyişən dünyanın tələblərinə açıq olsunlar. Süni intellekt, rəqəmsal alətlər və qlobal trendlər artıq müasir uğurun əsas şərtləridir.

İkinci bir vacib amil – hansı sahədə olursa-olsun, vicdanlı olmaqdır. Vicdanla işləmək, dürüst və səmimi münasibət göstərmək reputasiyanızı möhkəmləndirəcək, sizə uzunmüddətli uğur və etimad qazandıracaqdır. 

Üçüncüsü - şəbəkə qurun. Beynəlxalq tədbirlərə, konfranslara, layihələrə qatılın, əlaqələrinizi genişləndirin. Çünki bu əlaqələr gələcəkdə həm şəxsi, həm də peşəkar uğurlar üçün açar rolunu oynayacaq. 

Və ən əsası – Azərbaycanlı olduğunuzu fəxrlə daşıyın. Öz kimliyinizi qorumaq və eyni zamanda dünyaya açıq olmaq, sizi həm şəxsiyyət, həm də peşəkar olaraq fərqləndirəcəkdir.

Nicat Rüstəmzadə