Makron və Netanyahu İran-İsrail atəşkəsini müzakirə ediblər
Fransa Prezidenti Emmanuel Makron və İsrailin Baş naziri Benyamin Netanyahu arasında telefon danışığı baş tutub.
Crossmedia.az xarici KİV-ə istinadən xəbər verir ki, tərəflər İran və İsrail arasında qüvvədə olan atəşkəs rejimini, həmçinin Yaxın Şərqdəki ümumi təhlükəsizlik vəziyyətini müzakirə ediblər.
Prezident Makron “X” hesabında yayımladığı açıqlamada bölgənin təhlükəsizliyinin ciddi təhdid altında olduğunu vurğulayıb və Qəzzada atəşkəsin təmin edilməsinin zəruriliyini bildirib. O, eyni zamanda İranla bağlı danışıqların bərpasının vacibliyinə diqqət çəkərək deyib:
“İranın heç vaxt nüvə silahına sahib olmaması bizim ortaq məqsədimizdir”.
Fransa lideri bu məqsədlə Tehranın nüvə və ballistik proqramlarına dair danışıqlara geri qayıtmasının vacib olduğunu qeyd edib.
Makron, həmçinin Fransanın əsas prioritetləri sırasında Qəzza zolağına humanitar yardımın genişləndirilməsi, girovların azad olunması və iki dövlətli həllə yönəlmiş siyasi prosesin davam etdirilməsinin yer aldığını bildirib. Bu kontekstdə o, bütün tərəfləri atəşkəs rejiminə riayət etməyə çağırıb.
Qeyd edək ki, Fransa son günlər Yaxın Şərqdə gərginliyin azaldılması və diplomatik həll yollarının tapılması istiqamətində fəal təşəbbüslərlə çıxış edir.
22:15 25.06.2025
Oxunuş sayı: 782
