Cəbhədə qatil robotlar: Ukraynanın yeni ölüm mexanikası
Ukrayna ordusu iyun ayının əvvəlində süni intellektlə təchiz olunmuş yeni nəsil pilotsuz hava sistemlərini döyüş bölgəsində istifadəyə verib. Cəmi 10 min dollara başa gələn bu sistem hədəf seçimini və hücumu insan müdaxiləsi olmadan həyata keçirir.
“Gogol-M” adlandırılan sabit qanadlı PUA Ukrayna ərazisindən qalxaraq Rusiya daxilinə 200 kilometr irəliləyib və qanadlarına yerləşdirilmiş iki hücum dronunu buraxıb. Radara yaxalanmadan alçaqdan uçan kiçik dronlar yer hədəflərini müstəqil şəkildə aşkar edərək partlayıcılarla hücum həyata keçirib. Hücum zamanı hədəf seçimi və istiqamətləndirmə tamamilə süni intellekt tərəfindən yerinə yetirilib. İnsan müdaxiləsi isə yalnız hücum ediləcək hədəf növü və axtarış zonasının əvvəlcədən müəyyən olunması ilə məhdudlaşıb.
Crossmedia.az xəbər verir ki, istehsalçı “Strategy Force Solutions” şirkətinə görə, əsas daşıyıcı PUA və iki intihar dronundan ibarət sistemin ümumi dəyəri təxminən 10 min dollardır. Əsas sistem 300 km, hücum dronları isə əlavə 30 km məsafəni qət edə bilir. Əvvəllər bu tip tapşırıqlar 3–5 milyon dollar dəyərində raket sistemləri ilə yerinə yetirilirdi. Şirkət nümayəndələri bildirir ki, maliyyə təminatı olarsa, bu sistemdən ayda yüzlərlə, hətta minlərlə istehsal edə bilərlər.
İyunun 1-də Ukrayna ordusunun həyata keçirdiyi “Hörümçək toru əməliyyatı” zamanı Rusiyanın dərinliklərində yerləşən hava bazaları hədəf alınıb. Əməliyyata cəlb olunan ümumilikdə 117 pilotsuz aparat Rusiya Hərbi Hava Qüvvələrinin nüvə silahı daşımaq imkanına malik strateji bombardmançılarını vurmaq məqsədi daşıyıb.
Kamyonlardan buraxılan dronlar Rusiya tərəfinin siqnal pozucu sistemlərinə qarşı “terminal yönləndirmə” adlı proqram təminatı ilə təchiz olunub və bu sayədə hədəflərə avtonom şəkildə çatıb. Mütəxəssislər bildirir ki, bu cür əməliyyatlar Ukrayna və Rusiyanın döyüş meydanında istifadə etdiyi yüksək texnologiyaların yalnız kiçik bir hissəsidir.
Mədinə Cəlilova
19:40 25.06.2025
Oxunuş sayı: 698
