Papa XIV Leo ilk ayinində: “Bu dünyanın qaranlıq gecələrinə işıq gətirməyi ümid edirəm”
Katoliklərin yeni ruhani lideri Papa XIV Leo, seçildikdən sonra ilk ayinini bu gün Vatikanın Sistina Şapelində keçirdi. Türkiyə vaxtı ilə saat 12:00-da başlayan ayində ingilis dilində çıxış edən Papa, bütün Katolik Kilsəsi üçün “sadiq bir rəhbər” olmağı arzuladığını bildirib və Papa seçilməsinin “bu dünyanın qaranlıq gecələrinə işıq gətirməsini” ümid etdiyini deyib.
Crossmedia.az xarici KİV-ə istinadən xəbər verir ki, Papa Leo çıxışında, Katolik Kilsəsinin özünü “binalarının ihtişamı ilə deyil, üzvlərinin müqəddəsliyi ilə tanımlamalı olduğunu” vurğulayıb.
Ayinin italyanca hissəsində isə Papa, bu gün bir çox yerdə “texnologiya, pul, uğur, güc və həzzin” Xristian inancından daha üstün tutulduğunu bildirib. O, inananların tez-tez “absurd, zəif və ağılsız insanlar” kimi görüldüyünü və onlara qarşı alçaldıcı münasibətin göstərildiyini qeyd edib. “Onlarla lağ edilir, ən yaxşı halda onlara mərhəmət və tolerantlıqla yanaşılır” deyə Papa əlavə edib.
İsa Məsihin obrazının isə “karizmatik lider və ya bir növ Supermən səviyyəsinə endirildiyini” deyən Papa, bu anlayışın yalnız inanmayanlar deyil, inananlar arasında da yayıldığını, nəticədə insanların “faktiki bir ateizm” içində yaşadığını bildirib.
“The Guardian”qəzetinin məlumatına görə, kardinalların toplaşdığı Sistina Şapelinin yerləşdiyi Müqəddəs Pyotr Meydanında turist qrupları olsa da, Kilsə ayini meydandakı ekranlarda canlı yayımlamamağı seçib. Bu səbəbdən meydanda böyük izdiham yaranmayıb.
Papa XIV Leo, dünən seçildikdən sonra etdiyi ilk çıxışında sülhə çağırış etmiş, Papa Fransiskonu yad edərək dialoq və körpülərin qurulması zərurətini vurğulamışdı. Uzun illər xidmət etdiyi Perunu ayrıca salamlayan Papa, əziyyət çəkənlərə yardım edən bir Kilsə üçün birlikdə irəliləyəcəklərini söyləmişdi.
Vatikanın açıqlamasına görə, Papa XIV Leo-nun vəzifəyə rəsmi başlama ayini 18 may tarixində Müqəddəs Pyotr Meydanında keçiriləcək. Ayinə dünya liderlərinin də qatılması gözlənilir.
Mədinə Cəlilova
22:25 09.05.2025
Oxunuş sayı: 690
