Putin Zəfər Günü paradında: “Həqiqət və ədalət bizim tərəfimizdədir”
Rusiya prezidenti Vladimir Putin Moskvada keçirilən Zəfər Günü paradında çıxış edərək “həqiqət və ədalətin” Rusiya tərəfini dəstəklədiyini bildirib.
9 May İkinci Dünya Müharibəsində qələbənin ildönümü münasibətilə Moskvadakı Qızıl Meydanda hərbi parad keçirilib. Mərasimdə Putin, ölkəsini ziyarət edən Çin lideri Si Cinpin ilə yanaşı oturub. Mərasimə Venesuela prezidenti Nikolas Maduro da daxil olmaqla onlarca ölkənin dövlət və hökumət başçıları qatılıb.
Paradda Rusiya hərbçiləri ilə yanaşı Azərbaycan, Belarus, Çin, Misir, Laos, Qazaxıstan, Qırğızıstan, Monqolustan, Myanmar, Tacikistan, Türkmənistan, Özbəkistan və Vyetnam hərbi kontingentləri də iştirak edib.
Putin çıxışında İkinci Dünya Müharibəsindəki müttəfiqlərin töhfəsini heç zaman unutmayacaqlarını deyib. “Nasizm, rus düşmənçiliyi və antisemitizmə qarşı daim mübarizə aparacağıq”, – deyən Putin, 3 ildən artıq davam edən Rusiya–Ukrayna müharibəsinə işarə edərək, “bütün ölkənin xüsusi hərbi əməliyyatı dəstəklədiyini” vurğulayıb.
“Xalqımızın şücaət və dözümü ilə qürur duyuruq. Rusiya hər zaman nasizmə, rusofobiyaya və antisemitizmə qarşı sarsılmaz sədd olub və belə də qalacaq”, – deyə o bildirib.
Crossmedia.az Rusiya dövlət xəbər agentliyi TASS istinadən xəbər verir ki, Putin çıxışında “İkinci Dünya Müharibəsinin dərslərini unutmuruq və hadisələrin təhrif olunmasına, cəlladların haqlı göstərilməsinə və əsl qaliblərin gözdən salınmasına heç vaxt imkan verməyəcəyik” ifadələrindən istifadə edib.
Putin çıxışını bu sözlərlə tamamlayıb: “Veteranlarımıza, onların vətən sevgisinə, müdafiə ruhuna və ədalət dəyərlərinə daim hörmətlə yanaşacağıq. Bu dəyərləri qoruyub saxlamalı, gələcək nəsillərə ötürməliyik. Rusiya naminə, onun böyüklüyü və rifahı uğrunda hərbi və sülh strategiyalarında birlik ruhumuza güvənəcəyik”.
Putin paraddan sonra Şimali Koreyalı hərbçilərlə görüşərək onlara uğurlar arzulayıb. Aprel ayının sonunda Pxenyan Rusiyaya Ukrayna üçün hərbçi göndərdiyini təsdiqləmişdi.
Qızıl Meydandakı parad hava qüvvələrinin nümayiş uçuşu ilə başa çatıb. TASS-ın məlumatına görə, paradda 10 minə yaxın hərbçi iştirak edib, 27 ölkənin lideri isə tədbiri izləyib.
Bu liderlər arasında Braziliya prezidenti Luiz İnasiu Lula da Silva, Serbiya prezidenti Aleksandar Vuçiç, Slovakiya baş naziri Robert Fiko, Sırp Respublikasının prezidenti Milorad Dodik, Belarus prezidenti Aleksandr Lukaşenko, Küba prezidenti Migel Dias-Kanel, Misir prezidenti Əbdülfəttah əs-Sisi, Fələstin prezidenti Mahmud Abbas, Efiopiya prezidenti Tay Atske Selassie və Qvineya-Bisau prezidenti Umaro Sissoko Embalo da yer alıb.
Mədinə Cəlilova
21:21 09.05.2025
Oxunuş sayı: 890
