ABŞ-dan İsrailə sərt xəbərdarlıq: Təl-Əviv dəstəyi itirə bilər!
ABŞ administrasiyası və İsrail hökuməti Qəzzada atəşkəs və məhbus mübadiləsi razılaşmasının reallaşdırılması mövzusunda ciddi fikir ayrılığı yaşayır.
Crossmedia.az "The Jerusalem Post"un yaydığı məlumata istinadən xəbər verir ki, Vaşinqtonun yüksək səviyyəli rəsmisi İsrailin danışıqlardakı passiv mövqeyini sərt şəkildə tənqid edib.
Məlumatda bildirilir ki, Qəzzadakı israilli əsirlərin ailələri ilə ABŞ rəsmiləri arasında keçirilən görüşdə, Vaşinqton nümayəndəsi İsrail tərəfini razılaşmanın əldə edilməsinə dəstək verməməkdə ittiham edib.
“Əgər razılaşma olmazsa, bədəlini İsrail ödəyəcək” – deyə o, vurğulayıb.
ABŞ rəsmisi əlavə edib ki, İsrail atəşkəs və məhbus mübadiləsində iştirak etməsə belə, Vaşinqton Səudiyyə Ərəbistanı ilə aparılan səyləri davam etdirəcək.
Eyni görüşdə ABŞ rəsmisi Qəzzadakı əsirlərin indiyədək sənədsiz mübadilə uğrunda ödədikləri əziyyətə diqqət çəkərək, proses yenə də pozularsa, nəticələrin təkcə onlara deyil, İsrailə də ağır olacağını bildirib.
Bu açıqlamalar israilli məhbusların ailə üzvləri tərəfindən “ənənəvi olaraq İsraili qeyd-şərtsiz dəstəkləyən müttəfiqin ton dəyişikliyi” kimi qiymətləndirilib.
“İsraildən icazə almağa ehtiyacımız yoxdur”
Mövzuya münasibət bildirən ABŞ-ın İsraildəki səfiri Mayk Həkəbi isə Kanal 12 telekanalına müsahibəsində deyib ki, Vaşinqton Yəməndəki husilərlə atəşkəs razılaşmasının reallaşdırılması üçün İsrailin icazəsinə ehtiyac duymur:
“Amerika Birləşmiş Ştatları husilərin bizim gəmilərə hücumlarının qarşısını almaq üçün lazımi addımları atacaq və bunun üçün İsraildən icazə tələb etmir” – bildirib səfir.
Həkəbi əlavə edib ki, İsraildə təxminən 700 min Amerika vətəndaşı yaşayır, əgər husilər tərəfindən onlara hər hansı zərər dəysə, bu, birbaşa ABŞ-ın cavab verəcəyi məsələ olacaq.
Bu açıqlamalar ABŞ administrasiyasının İsrailə münasibətində tonun sərtləşdiyini və diplomatik təzyiqin artdığını göstərir.
Aybəniz Səfərova
17:59 09.05.2025
Oxunuş sayı: 897
