Çinli əsgər cəbhədən xəbərdarlıq etdi: “Bura gəlməyin”
Rus ordusunda döyüşən çinli bir əsgər, bu yola qədəm qoymağı düşünən həmvətənlərinə qorxulu xəbərdarlıq edib. O, komandirləri tərəfindən ayağa qalxmağa belə imkan olmayan qaranlıq bir çuxura 21 gün müddətinə kilidləndiyini iddia edir.
Crossmedia.az xarici mediaya istinadən xəbər verir ki, əsgər bu cəzanın səbəbinin komandiri ilə qoruyucu avadanlıqlar üzərində yaranan mübahisə olduğunu bildirib.
Müharibəyə “xaricdə hərbi həyatın dadına baxmaq” üçün qatıldığını deyən 29 yaşlı çinli, ön cəbhədə keçirdiyi ağrılı bir ilin ardından bunun “böyük bir səhv” olduğunu anlayıb. CNN-in məlumatına görə, o, çuxurda keçirdiyi günləri başını qaldıra bilmədiyi və bütün döyüş ruhunun sındığı dövr kimi təsvir edib.
“Bəzi həqiqətləri deməli və o məntiqsiz çinliləri xəbərdar etməliyəm: bura gəlməyin”,-deyə çıxış edən əsgər, Rusiyanın döyüş maşınına qarşı sərt ifadələr işlədib. “Dünyanın ikinci böyük ordusu tam bir zarafatdır”, – deyə o bildirib və zəif texniki təminat, zəif logistika, pis münasibət və “ciddi korrupsiya” kimi problemlərdən şikayətlənib.
Ukrayna və Rusiya, ordularını gücləndirmək üçün xarici döyüşçülərdən istifadə edir. Ukrayna Prezidenti Volodimir Zelenski iki çinli döyüşçünün əsir alındığını açıqlayıb və Rusiyanın tərəfində çox sayda çinlinin döyüşdüyünü iddia edib. Kiyev, ən azı 155 çinli vətəndaşın Rusiya üçün vuruşduğuna dair məlumatlara sahib olduğunu bildirib.
Mədinə Cəlilova
19:31 29.04.2025
Oxunuş sayı: 987
