"Düyməcik" nağılı səhnəyə gəlir – Milli Gənc Tamaşaçılar Teatrında yeni premyera
Azərbaycan Dövlət Milli Gənc Tamaşaçılar Teatrı daha bir maraqlı səhnə əsərinin premyerasına hazırlaşır. Danimarkalı nağıl ustası Hans Xristian Andersenin məşhur "Düyməcik" əsəri əsasında hazırlanan eyniadlı tamaşanın məşqləri artıq yekunlaşmaq üzrədir.
Teatrın mətbuat xidmətindən verilən məlumata görə, aprelin 19-da baş tutacaq premyera izləyicilərə mehribanlıq, dostluq və müdriklik aşılayan bir nağıl aləmi bəxş edəcək. Tamaşa insanlara hər bir çətinlik qarşısında ümidini itirməməyi və xoşbəxtliyə gedən yolda saf qəlbin, mərhəmətli düşüncənin önəmini xatırladır.
Səhnə əsərinin quruluşunu Ayla Osmanova həyata keçirir. Tamaşanın quruluşçu rəssamları Şahin Hüseynli və Yekaterina Xaritonova, musiqi tərtibatçısı Aygül Quliyeva, rejissor assistenti isə Nəsibə Canəliyevadır. Tamaşanın plastik həlli Ceyhun Dadaşova məxsusdur.
"Düyməcik" tamaşasında Aydan Həsənzadə, Fəridə Qurbanova, Ramil Məmmədov, Xəyalə Qasımova, İlhan Sadıqov, Könül Əbilova, Elgün Yəhyayev, Mətləb Abuşov, İradə Rəşidova, Anar Seyfullayev, İlaha Əmirxanova, Aybəniz Heydərova, Nuranə Vaqifqızı və Gelbəniz Lətifova çıxış edəcəklər.
Kiçik yaşlı tamaşaçılar üçün nəzərdə tutulan bu rəngarəng tamaşa həm də böyüklərə xitab edən dərin mənalarla zəngindir.
Aprel ayının 19-u tamaşanın premyerası nəzərdə tutulub.
Ayan Sədi
19:03 09.04.2025
Oxunuş sayı: 8210
