"Rus evi" Azərbaycan mədəniyyəti üzərində yad mədəniyyət qurmağa çalışıb - RƏY
Azərbaycan dövləti milli təhlükəsizliyi təmin etmək və ölkədə xarici təsirlərin qarşısını almaq məqsədilə ciddi tədbirlər həyata keçirir. Bu çərçivədə müxtəlif təşkilatların fəaliyyətləri diqqətlə araşdırılır və qanunsuz fəaliyyət göstərdiyi aşkarlanan qurumlara qarşı tədbirlər görülür. ABŞ-nin USAID təşkilatının humanitar yardım və inkişaf layihələri adı altında ölkədə siyasi və kəşfiyyat xarakterli fəaliyyətlərlə məşğul olduğu üçün fəaliyyətinə son qoyuldu.
Azərbaycanda fəaliyyət göstərən bir digər qeyri-şəffaf qurum “Rus evi” dir. Bu qurumun informasiya resurslarından istifadə edərək casusluq fəaliyyəti ilə məşğul olduğu bildirilir. Dövlətin güc strukturlarının apardığı araşdırmalar nəticəsində təşkilatın fəaliyyətinin Azərbaycan qanunlarına və milli maraqlarına zidd olduğu müəyyən edildi. Nəticədə Azərbaycan tərəfi “Rossotrudniçestvo” agentliyinin ölkə ərazisində fəaliyyətinə xitam verilməsi barədə diplomatik kanallar vasitəsilə Rusiyaya rəsmi bildiriş göndərib.
“Rus evi” nin, həqiqətən, qaldırılan ittihamlarla məşğul olduğu doğrudurmu? Qaldırılan “Rus evi” məsələsi Rusiya-Azərbaycan arasındakı ziddiyyətlərin təzahürü kimi qiymətləndirilə bilərmi?
Mövzu ilə bağlı Milli Məclisin deputatı Hikmət Babaoğlu Crossmedia.az-a açıqlama verib:
“Azərbaycan öz təhlükəsizliyinin təmin olunması üçün müxtəlif sahələrdə tədbirlər görür. Bu gün informasiya erasında təhlükəsizlik məsələləri hərbi təhlükəsizlik və ya qaba güc vasitələrinin törətdiyi təhlükələr deyil. Rusiyanın "Rus evi" təşkilatı nəticə etibarilə Azərbaycan mədəniyyəti üzərində yad, imperativ mədəniyyət qurmağa cəhd göstərib. Mümkün vasitələr ilə bizim təhlükəsizliyimiz üçün vacib olan informasiyaların toplanması və onun ötürülməsi kimi məsələlərdə iştirakçı olması halları mümkündür. Bütün bunlar, əlbəttə ki, daxili ictimai münasibətlərimizdə, həmrəyliyimizdə və milli identikliyimizdə problem yaradır. Yəni əgər hər bir fərd başqa bir mədəniyyətin daşıyıcısına çevrilirsə onu öz mədəniyyətindən üstün tutursa, o, öz ölkəsinə qarşı hər cür cəsusluq, terror, milli hakimiyyətə qarşı çıxmağa qədər ən müxtəlif addımları ata bilər. Ona görə də hesab edirəm ki, Azərbaycan bu təşkilatın fəaliyyətini dayandırmaqla çox doğru qərar qəbul etdi”.
H.Babaoğlu yaxın zamanda USAİD- təşkilatının da oxşar fəaliyyətindən danışıb:
“Hazırkı postmodern cəmiyyətlərdə ən böyük təhlükə mədəniyyət və insan hüquqları adı altında, ictimai təşkilatlanmala adı altında həyata keçirilən tədbirlərdir ki, əsl təhlükə məsələləri də burdan qaynaqlanır. Yaxınlarda biz USAİD-in xəyanəti ilə bağlı nələrin baş verdiyini gördük. İş o dərəcəyə çatdı ki, 1961-ci ildə yaradılmış bu təşkilatın maliyyə vəsaiti ABŞ-nin nüfuzunun aşağı düşməsinə və dövlətlərarası əməkdaşlıq müstəvisində zərər görməsinə gətirib çıxardı. Həm də təşkilat bütün qanunsuz işlərlə məşğul olub nəinki yaradılış məqsədi olan inkişaf”.
Ayhan Ağarzayev
16:30 06.02.2025
Oxunuş sayı: 7060
