Ermənistanda seçki məğlubiyyəti müdafiə nazirinin mövqeyini zəiflədib
Ermənistanın Stepanavan şəhərində keçirilən yerli seçkilərin nəticələri müdafiə naziri Suren Papikyanın hakim komanda daxilindəki mövqeyini zəiflədib.
Crossmedia.az xəbər verir ki, “Hraparak” nəşri bu barədə məlumat yayıb.
Nəşrin iddiasına görə, oktyabrın 25-də keçirilən seçkilərdə hakim “Vətəndaş müqaviləsi” partiyasının təşviqat kampaniyasına məhz Suren Papikyan rəhbərlik edib.
Bildirilib ki, müdafiə naziri doğma bölgəsində keçirilən seçkiqabağı görüşlərdə şəxsən iştirak edib və deputat Arpi Davoyanla birlikdə hakim partiyanın namizədi Araik Nersisyanın lehinə təbliğat aparıb.
Lakin səsvermənin nəticələri hakim partiyanın gözləntilərini doğrultmayıb.
İlkin nəticələrə əsasən, “İş adamı” partiyası 41,38 faiz səslə birinci, hakim “Vətəndaş müqaviləsi” partiyası isə 35,20 faizlə ikinci yeri tutub. “Güclü Ermənistan” partiyası 19,62 faiz səs toplayıb.
“Hraparak” seçkinin nəticələrini parlament seçkilərindən sonra Suren Papikyan üçün ikinci siyasi uğursuzluq kimi qiymətləndirib.
Nəşrin iddiasına görə, Stepanavandakı nəticələr müdafiə nazirinin hakim komanda daxilindəki mövqeyinə də mənfi təsir göstərib.
11:54 27.10.2026
Oxunuş sayı: 59
