Ukraynanın müdafiə büdcəsində 23 milyard avroluq boşluq yaranıb
Ukrayna bu il müdafiə xərclərini qarşılamaq üçün 23 milyard avroluq maliyyə çatışmazlığı ilə üzləşib. Kiyev həm silah və hava hücumundan müdafiə sistemlərinin alınması, həm də hərbçilərin maaşlarının ödənilməsi üçün əlavə vəsait axtarır.
Crossmedia.az xəbər verir ki, bu barədə “POLITICO” məlumat yayıb.
Məlumata görə, maliyyə çatışmazlığı Ukrayna Müdafiə Nazirliyinin ilin ikinci yarısına planlaşdırılan xərclərin bir hissəsini ilin ilk yarısında həyata keçirməsindən sonra yaranıb. Eyni zamanda, Avropa İttifaqının Ukraynaya ayırdığı 90 milyard avroluq kreditin Macarıstanın yaratdığı maneələr səbəbindən gecikməsi vəziyyəti daha da çətinləşdirib.
Ukrayna Prezidenti Volodimir Zelenski bildirib ki, ölkəyə gələn ilin əvvəlində silah və digər hərbi təchizatın alınmasını təmin etmək üçün əvvəlcədən 6,8–8,5 milyard avro lazımdır. Bundan əlavə, hərbçilərin maaşları, həlak olan hərbçilərin ailələrinə ödənişlər və digər hərbi xərclər üçün təxminən 17 milyard avro tələb olunur.
Zelenski Kiyevdə keçirilən “istəkli ölkələr koalisiyası”nın toplantısı zamanı Qərb ölkələrindən Ukraynaya dəstəyin davam etdirilməsini istəyib.
Toplantıda Böyük Britaniyanın Baş naziri Endi Börnhəm, Avropa Şurasının Prezidenti Antonio Koşta, Lüksemburqun Baş naziri Lük Friden, Moldovanın Prezidenti Maya Sandu, Estoniyanın Prezidenti Alar Karis, Finlandiyanın Prezidenti Aleksandr Stubb və digər Avropa ölkələrinin nümayəndələri iştirak edib. Fransa Prezidenti Emmanuel Makron və Almaniya kansleri Fridrix Merts isə toplantıya onlayn qoşulublar.
Maliyyə probleminin həlli istiqamətində Avropa Komissiyası Ukraynaya əlavə 6,1 milyard avroluq müdafiə maliyyələşdirilməsini təsdiqləyib. Vəsaitin hava hücumundan müdafiə raketləri, döyüş sursatı və radar sistemlərinin alınmasına yönəldilməsi nəzərdə tutulur.
Bununla belə, Kiyevin ehtiyac duyduğu məbləğlə müqayisədə bu vəsait kifayət etmir. Ukrayna rəhbərliyi Avropa İttifaqından nəzərdə tutulan maliyyənin bir hissəsinin vaxtından əvvəl ayrılmasına çalışır.
Məlumata görə, Ukraynada daxili siyasi maneələr də xarici maliyyənin əldə olunmasını çətinləşdirir. Zelenski Qərb yardımının bir hissəsinin ayrılması üçün tələb olunan 24 islahat qanun layihəsinin parlamentdə gecikdirildiyini bildirib.
Bundan əvvəl Ukrayna 2026-cı il üçün Avropadan 30 milyard avro maliyyə alacağını açıqlamışdı. Bu vəsait Avropa İttifaqının ümumilikdə 90 milyard avroluq kredit paketinin bir hissəsidir.
17:47 25.08.2026
Oxunuş sayı: 40
