Sosium

Dünya Azərbaycanlılarının Həmrəylik Gününün qeyd edilməsi birlik və bərabərliyin simvoludur

Milli birliyin və bərabərliyin simvolu olan Dünya azərbaycanlılarının həmrəylik günü hər il xüsusi təntənə ilə qeyd olunur. 16 dekabr 1991-ci il tarixində Naxçıvan Muxtar Respublikası Ali Məclisində ulu öndər Heydər Əliyevin sədrliyi ilə keçirilən iclasda 31 dekabr dünya azərbaycanlılarının həmrəylik bayramı kimi qeyd olunması barədə qərar qəbul edildi. Həmin ilin 25 dekabr tarixində Ali Sovetin Milli Şurası birliyin və həmrəyliyin uğurlu gələcəyini təmin edən tarixi qərarı qəbul etdi. 1991-ci ildən etibarən hər il 31dekabr tarixini bütün azərbaycanlılar rəsmən bayram kimi qeyd edir. Ümummilli lider Heydər Əliyev həmrəylik gününü təsis etməklə xalqın birləşməsinə və ideoloji həmrəyliyinə müvəffəq olmuşdur. Ulu öndər xarici ölkələrə səfərləri zamanı orada yaşayan, fəaliyyət göstərən həmvətənlərimizlə görüşürdü.

Bayram dünyanın bir çox ölkəsində yaşayan azərbaycanlılarla əlaqə qurmaq, onlar arasında birlik və həmrəylik yaratmaq işində mühüm rol oynayır. Dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır. Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, erməni lobbi dairələrinin təxribatlarının qarşısının alınmasında qətiyyət nümayiş etdirirlər.

2001-ci il noyabr ayında Bakıda Dünya azərbaycanlılarının birinci Qurultayı keçirilmiş və bu qurultaydan sonra ulu öndər Heydər Əliyev 5 iyul 2002-ci il tarixli Fərmanı ilə xarici ölkələrdə yaşayan azərbaycanlılarla iş üzrə Dövlət Komitəsini (Diasporla İş üzrə Dövlət Komitəsi) yaratdı. 27 dekabr 2002-ci il tarixində isə “Xaricdə yaşayan azərbaycanlılarla bağlı dövlət siyasəti haqqında” qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirdi.

Prezident İlham Əliyev xarici ölkələrdə yaşayan azərbaycanlılarla əlaqələrin genişləndirilməsi istiqamətində genişmiqyaslı tədbirlər həyata keçirir. Ölkə baaşçısı xaricdə yaşayan hər bir həmvətənimizin maraq və mənafeyinin qorunmasını Azərbaycan dövlətinin başlıca vəzifəsi hesab edir. Ölkəmizin sərhədlərindən kənarda yaşayan azərbaycanlılarda milli ruhun yüksəldilməsinə, onların vahid ideologiya və məqsədlər ətrafında sıx səfərbər olmalarına böyük töhfə verir. Prezident İlham Əliyev “Dünya azərbaycanlılarının II qurultayının keçirilməsi haqqında” 8 fevral 2006-cı il tarixli Sərəncamına uyğun olaraq, həmin ilin 16 mart tarixində Bakıda keçirilən növbəti toplantı ölkəmizlə bağlı həqiqətlərin dünya ictimaiyyətinə çatdırılması istiqamətində əhəmiyyətli rol oynamışdır.

Xaricdə yaşayan azərbaycanlıların sosial müdafiəsini gücləndirmək məqsədilə cənab prezident İlham Əliyev 6 iyul 2018-ci il tarixli Fərmanı ilə Diasporla İş üzrə Dövlət Komitəsinin tabeliyində Azərbaycan Diasporuna Dəstək Fondu yaradıldı. 2019-cu ildə isə “Diaspor fəaliyyətində xidmətə görə” Azərbaycan Respublikasının medalı təsis edildi.

Vətən müharibəsində dünyanın bütün ölkələrində yaşayan azərbaycanlılar fəallıq göstərərək sıx birləşdilər. Azərbaycanın haqq səsinin eşidilməsi üçün səylərini əsirgəmədilər. Müharibə zamanı siyasi əqidəsindən, statusundan, vəzifəsindən asılı olmayaraq hər bir Azərbaycan vətəndaşı milli həmrəylik və bərabərlik göstərdi. Ali Baş Komandanın vətənə bağlılığı xalqımızı torpaqlarımızın azadlığı uğrunda mübarizədə həmrəy etdi. Azərbaycan Respublikasının Prezidenti İlham Əliyevin qətiyyəti, ilk gündən nümayiş etdirdiyi hərbi-siyasi əzmi hər bir azərbaycanlını öz rəhbərinin ətrafında daha sıx birləşməyə nail olundu.