İşığa tələsənlərin parlaq məkanından... - Reportaj

Sahil kənarı, sakit axan dəniz, aram-aram göyüzündə süzən qağayılar və şam ağacları, rəngarəng işıqlarla bəzədilmiş şəhər... Lakin bu həzinliyin fonunda bir də harasa tələsən, təlaş içində olan insanlar...

İnsanların təlaşı isə əbəs yerə deyil. Biraz irəlilədikcə məlum olur ki, onların hər biri işığa doğru can atır. O işıq ki, bizi daima özünə çağırır, aydınladır. Elə biz də yolumuzu məhz işıq gələn tərəf - I Bakı Kitab Festivalından saldıq. "Yeni ilə yeni kitablarla" şüarı ilə insanları bayram zamanı da mütaliədən kənar qoymayan festivalın keçirildiyi mərkəzə yaxınlaşan zaman əlində kitab, üzündə bu kitabları əldə etməyin təbəssümü əks olunan insanları görürük və beləcə, məkana daxil oluruq. Bir anlıq başqa bir aləmdə olduğumuzu zənn edirəm. Lakin bunlar- ətrafı bürüyən kitab, qəzet, jurnal qoxuları və onların hər birini almaq istəyən insanlar həqiqətdir.

Bu qədər kitabsevəri bir arada görmək isə çox xoş təəssürat bağışlayır. Zalda sayısız-hesabsız stend, yüzlərlə kitab və hər yaşdan kitabsevər var. Hər kəs stendlərin qarşısında kitablarla maraqlanır, burada yazarlar və satıcılar ilə kitablar haqqında söhbət edirlər. İlk diqqətimizi çəkən, "Sən də bir kitab oxu!" şüarlı stend olur. Burada uşaqlar üçün nəzərdə tutulmuş hekayələr, nağıllar toplusunu görürük. Bu zaman bizi sözügedən kitabların müəllifi, yazıçı Eyvaz Zeynalov qarşılayır. O, müəllifi olduğu "Qış günəşi", "Rəngsiz yuxu", "Uşaq hekayələri və nağıllar" adlı kitablarından söz açaraq, burada yer alan qəhramanlar, onların fonunda balaca oxucalara çatdırmaq istədiyi məqamları qeyd edir. Növbəti dayanacağımız, Avrasiya Press Nəşriyyatının stendi olur. Nəşriyyatın müdiri, AYB(Azərbaycan Yazıçılar Birliyi) nin üzvü, hərbi jurnalist Nazim Əhmədli müəllifi olduğu "Qız Təbəssümü", "Ruhum da sənin olacaq", eləcə də nəşriyyata məxsus olan bir sıra kitablar barəsində danışır. O qeyd edir ki, bugünədək çap olunan kitabları ölkə ərazisi ilə məhdudlaşmayıb, hər biri beynəlxalq səviyyədə də tanınır və sevilir:

"Sözügedən "Qız Təbəssümü" kitabında 8 hekayə yer alır və burada 33 yaşlı azərbaycanlı qızın daşa dəyib, çilik-çilk olmuş taleyindən bəhs edir. Stenddə nəşriyyatımızın kitabları da mövcuddur. Elə bunlardan biri də Azərbaycan Yazıçılar Birliyinin üzvü, Beynəlxalq Avrasiya Fondunun direktoru Umud Rəhimoğlunun
"Otuz il sülh naminə" adlı kitabıdır ki, burada Azərbaycan xalqının 30 il ərzində qarşılaşdığı çətinliklərdən, qarşılaşdığı məqamlardan danışılır".

Nazim bəy söhbət əsnasında Laçın rayonunun Əhmədli kəndi və orada yaşayan əhali, qaçqınlarla bağlı məlumatı özündə əks etdirən "Mollaəhmədli və Mollaəhmədlilər" adlı bədii publisistik, etnoqrafik kitabını da qeyd edərək, sözügedən kitabda yer alan məqamların gerçəkliyə, dəqiq faktlara əsaslandığını bildirir.

Nazim bəylə xoş söhbətimizin ardınca yan stendə nəzər yetiririk. Burada isə yazıçı Əşrəf Əşrəfovu görürük. O, müəllifi olduğu ilk romanı olan "Solğun" barəsində bəhs edir.

" "300 illik nostalgiya" trilogiyasından ilk kitab olan bu romanda əsərin baş qəhramanı Vampirdir. O, günəşə çıxa bilmir və bu səbəbdən dəri rəngi ağdır, solğundur. Eləcə də burada digər bir qəhraman var ki, o baş verənləri öz keçmişi ilə əlaqələndirir, xatırlayır və bu xatirələri də dəqiq olmur. Elə buradan qənaətə gələrək, romanı "Solğun" adlandırdım".

Davamında digər stendləri gəzməyə davam edirik. Burada yazıçıların, şairlərin təqdimat, imza mərasimləri, şeir saatları, uşaqlar üçün nağıl və əyləncə saatları, master-klasslar yer alır. Eləcə də son illərdə keçirilən sərgilərin formatına əlavə kimi burada yerli qəzet, jurnalların stendlərin olması və onlara olan marağın müşahidəsi zövqvericidir. Biz isə müxtəlif stendlərlə tanış olur, irəliləyirik. Lakin bu zaman diqqətimizi bir stend çəkir. Stenddə müxtəlif janra, maraqlı ada malik kitablar yer alır. Bu məqamda bizə, sözügedən kitabların müəllifi, yazıçı, jurnalist Rasim Qaraca yaxınlaşır.

Mediadan gəldiyimizi bilib, sözün əsl mənasında, o bizdən sorğu götürür. Proses yad olmadığı üçün suallarını asanlıqla cavablayırıq. Lakin yekunda Rasim bəy cavab olaraq söyləyir: "Cəsarətini hər zaman qoru!" Ardınca, müəllifi olduğu "Sənin toxunduğun hər şey" adlı kitabını hədiyyə edərək, imzasını həkk edir. Bu an, bizim üçün çox dəyərlidir. Buna görə də buradan ayrılmaq da bir o qədər çətindir. Əslində, vaxt tamam olana qədər qalmaq istərdim, kitabları yarıda saxlamağı sevmədiyim kimi bu günü də yarıda bitirməyi istəməzdim. Lakin hər şey qədərində gözəldir deyir, məkanı tərk edirik...

Aytac Kərimova