Ermənistan silahlanır, Azərbaycan isə hazırdır: Yeni müharibə anonsu
Azərbaycan ilə Ermənistan arasında sülh sazişinin imzalanması istiqamətində müsbət addımların atıldığı bir vaxtda İrəvanın Hindistandan və digər ölkələrdən İran səması vasitəsilə intensiv hərbi yüklər daşıması regional sabitlik üçün ciddi suallar doğurur. Mövzu ilə bağlı Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu Crossmedia.az-a açıqlama verib.
Siyasi şərhçi bildirib ki, iki ölkə arasında hələ ki yekun sülh sazişinin imzalanmaması fonunda Ermənistanın sürətlə silahlanması Azərbaycan tərəfində haqlı narahatlıq yaradır:
"Azərbaycanla Ermənistan arasında hələ yekun sülh sazişi imzalanmayıb və buna görə də Ermənistanın hərbi cəhətdən silahlanması Azərbaycanı narahat etməyə bilməz. Azərbaycanın beynəlxalq hüquqa söykənən kifayət qədər ədalətli bir yanaşması var: Ermənistan konstitusiyasında yer alan ölkəmizə qarşı ərazi iddiaları aradan qaldırılmalıdır. Bu məsələnin gecikdirilməsi təbii ki, yekun sülh sazişinin bağlanması yolunda dayanan başlıca maneədir. Ermənistandakı son siyasi proseslər də göstərdi ki, İrəvan rəhbərliyi konstitusiyanın dəyişdirilməsinə tələsmir. Baş nazir Nikol Paşinyan və yüksək səviyyəli dövlət rəsmilərinin bu istiqamətdə müsbət hesab oluna biləcək bəyanatlarına rəğmən, reallıqda fərqli mənzərə görünür".
Ə.Zülfüqaroğlu vurğulayıb ki, Hindistandan İran üzərindən Ermənistana hərbi sürsatların daşınması sülh prosesinə kölgə salan amildir:
"Sülh danışıqları fonunda Hindistandan İran marşrutu ilə Ermənistana intensiv şəkildə silahların daşınması mənfi tendensiya kimi qiymətləndirilməlidir. Çünki hazırda Ermənistanın münaqişəli vəziyyətdə olduğu yeganə dövlət Azərbaycandır və faktiki olaraq müharibə vəziyyəti tam bitməyib. Bölgədə destabilizasiyada maraqlı olan Hindistanın bu prosesdə yer alması və bu cür addımların atılması arzulanan sülh mühitinə tamamilə ziddir".
Ekspert sonda qeyd edib ki, Azərbaycan hər zaman olduğu kimi bütün ehtimal olunan ssenarilərə hazırdır:
"İstənilən halda Azərbaycan bütün ssenarilərə tam hazırdır. Sülh prosesinin müsbət yöndə irəliləməsində ölkəmizin rolu müstəsnadır. Azərbaycan prosesi tam idarə edən tərəfdir və rəsmi Bakının yürütdüyü siyasət bölgədə dayanıqlı sabitliyin bərpa olunmasına, eyni zamanda beynəlxalq hüququn təmin edilməsinə hesablanıb".
Fatimə Cabbarlı
13:30 25.07.2026
Oxunuş sayı: 62
