Əraqçı: ABŞ-yə dəstək verən ölkələr İran üçün qanuni hədəfə çevriləcək
ABŞ-nin İrana qarşı hərbi əməliyyatına qoşulan və ya ona hər hansı formada dəstək göstərən ölkələr İran Silahlı Qüvvələri üçün qanuni hədəf hesab olunacaq.
Crossmedia.az xəbər verir ki, bunu İranın xarici işlər naziri Abbas Əraqçı bəyan edib.
Abbas Əraqçı bu bəyanatı Çolpon-Atada keçirilən Şanxay Əməkdaşlıq Təşkilatının (ŞƏT) Xarici İşlər Nazirləri Şurasının iclasında səsləndirib. O bildirib ki, Tehran özünümüdafiə hüququ çərçivəsində bütün zəruri tədbirləri görmək hüququnu özündə saxlayır.
Nazirin sözlərinə görə, İrana qarşı həyata keçirilən hücumlarda istənilən iştirak, əməkdaşlıq və ya yardım həmin tərəflər üçün beynəlxalq hüquqi məsuliyyət yaradacaq.
Əraqçı çıxışı zamanı ŞƏT üzvü ölkələri beynəlxalq hüququn qorunması və təşkilat daxilində həmrəyliyin gücləndirilməsinə çağırıb. O vurğulayıb ki, “aqressiya diplomatiyanı, güc hüququ, ikili standartlar isə ədaləti əvəz etməməlidir”.
11:26 25.07.2026
Oxunuş sayı: 63
