Avropa demokratiyasının maskası: regionda təzyiq və siyasi manipulyasiya
Daim dünyaya demokratiya və insan hüquqlarından dərs keçən Avropanın demokratiya anlayışı tamam başqa müstəvidədir. Bir cəmiyyətdə demokratiya olması üçün ilk növbədə o cəmiyyət öz hakimiyyətini özü seçməlidir və bunun üçün imkan yaradılmalıdır. Bundan sonra burada insan hüquqlarından söhbət gedə bilər. Amma görürük ki, Avropa üçün bu tamam tərsinədir. Avropa demokratiya oyunu ilə ilk növbədə bir dövlətin hakimiyyətinə təzyiq göstərir, daha sonra demokratiya adı ilə xalqı ələ alır və öz planlarını həyata keçirir.
Çox uzağa getməyə ehtiyac yoxdur, öz regionumuzdan, Cənubi Qafqazdan danışaq. Fransanın Ermənistanı necə himayə etdiyini hələ də görürük. İstər hərbi, istər siyasi məsələlərdə Ermənistana daim dəstək verir. Artıq aradakı münasibətlər o dərəcədə inkişaf etdi ki, fransız mütəxəssislər Azərbaycan-Ermənistan sərhədinə müşahidəyə gəlmişdilər. Bu, açıq-aşkar Ermənistanı müharibəyə təhrik edərək regiondakı planlarını həyata keçirmək idi. Lakin Ermənistanın İkinci Qarabağ müharibəsindən sonra buna nə cəsarəti, nə də gücü var.
İndi isə Gürcüstana eyni dəstəyi verib, demokratiya adı altında siyasi böhran yaradırlar. Müxalifəti himayə edərək parlamentin qəbul etdiyi hakimiyyəti dəyişmək istəmək, müstəqil bir dövlətin daxili məsələlərinə qarışmaqdır.
Deputat Hikmət Babaoğlu Crossmedia.az saytına açıqlamasında bildirib:
"Avropa institutlarının müstəqil dövlətlərə müdaxiləsi müxtəlif məqsədli və müxtəlif xarakterli olur. Amma bütün hallarda bu müstəqil dövlətin iradəsini özünə tabe etdirmək cəhdləridir. Məsələn, Ermənistana dəstək verməklə onu Azərbaycana qarşı müharibəyə hazırlayırlar, Gürcüstana münasibətdə onun milli iradəsini əzməyə çalışırlar və demokratiya və insan hüquqları adı altında Gürcüstanda qeyri-hökumət təşkilatlarını maliyyələşdirməklə paralel hakimiyyət qururlar. Yəni Qərb tərəfindən ixrac olunan demokratiya, insan hüquqları kimi universal dəyərlər əslində Qərb imperiyalizminin başqa ölkələri özünə tabe etmək üçün olan silahıdır. Məsələnin mahiyyəti budur. Azərbaycana qarşı da onların bu cür planları olub. İnformasiya müharibəsi və ictimai rəyə təsir göstərməklə ictimai rəyi milli hakimiyyətə qarşı qaldırmaqla hakimiyyət üzərində təzyiq qurub öz maraqlarını təmin etməyə çalışırlar. Göründüyü kimi, bütün hallarda Qərb demokratiyanı öz coğrafiyasından kənarda bir silah kimi istifadə edir. Başqa dövlətləri tabe etmək vasitəsi kimi görür. Gürcüstanda son günlər baş verən hadisələrdə biz Avropa demokratiyasının nə olduğunu gördük."
Lakin Azərbaycan bu siyasi oyundan kənar qaldı. Çünki Azərbaycan Avropanın qərəzli və məkrli siyasətinə yaxşı bələddir. Xüsusən İkinci Qarabağ müharibəsi ərəfəsində olan qeyri-obyektiv fəaliyyətləri hər şeyi göstərdi. Lakin onların bu addımları heç bir təsir etmədi, çünki Prezident İlham Əliyev beynəlxalq arenada Azərbaycanı layiqincə təmsil etdi və qərəzli informasiyaların yayılmasının qarşısını qərəzli suallara verdiyi düzgün, susdurucu cavablarla aldı.
Ayhan Ağarzayev
10:06 07.12.2024
Oxunuş sayı: 7621
