Gürcüstana gedənlər bu QAYDAları bilməlidir: Əlavə xərclər və problemlər yarana bilər

Yeni ildən Gürcüstana səfər edən xarici vətəndaşlar üçün ciddi bir yenilik qüvvəyə minib. Artıq ölkəyə giriş zamanı səyahət sığortasının olması məcburi şərt kimi tətbiq olunur. Bu addım yalnız turistlər üçün deyil, həmçinin işgüzar səfərlər edən və ölkədə yaşayan ailələri ziyarət edən insanlar üçün də əhəmiyyət daşıyır. Xüsusilə Borçalı əsilli Azərbaycan vətəndaşları üçün bu qayda gündəlik səfərlərdə yeni tələblər və əlavə məsrəflər deməkdir.

Sığorta məcburiyyəti səfər planlarını, xərcləri və hazırlıq prosesini bir qədər dəyişdirəcək. Ekspertlər hesab edir ki, bu qərar həm vətəndaşların təhlükəsizliyini artırmaq, həm də gözlənilməz tibbi hallara qarşı qoruma təmin etmək məqsədi daşıyır. Bununla yanaşı, tətbiqin ilkin mərhələsində yaranacaq suallar və praktiki çətinliklər də gündəmə gələcək.

Yəni, Gürcüstana səfər edən hər kəs bundan sonra səyahət öncəsi sığortasını nəzərdən keçirməli və bu yeni qaydaya uyğun hazırlıq görməlidir. Ekspertlər bu mövzu ətrafında Crossmedia.az-a açıqlama verib.

Sığorta üzrə ekspert Vüsal Bədəlov bildirib ki, Gürcüstanda "Turizim haqqında olan qanun"da yeni dəyişikliklə 2026-ci il yanvarın 1-dən Gürcüstana səfər edən bütün əcnəbi vətəndaşlardan səyahət sığortası tələb olunur: "Bu sığortanın təminatı 30.000 lari dəyərində olmalıdır və bütün baş verə biləcək ani hadisələrdə, sağlamlıqla bağlı, xəstəliklər, lazım olacaq yardımlar,  səfər edən şəxsin orada hər hansı bir tibbi müdaxiləyə ehtiyacı olduqdan sonra ölkəsinə göndərilməsi kimi şərtlər sığorta müqaviləsində öz əksini tapmalıdır. Bu onun üçün lazımdır ki, Gürcüstana səfər edənlər tam rahatlıqlarını təmin edə bilsinlər. Bildiyimiz kimi, artıq dünyada tibb sektoru getdikcə bahalaşır və Gürcüstan da ölkəyə səfər edən şəxslərin tibbi məsuliyyətini öz üzərində saxlamaq  istəmir. Səyahət sığortası hazırlanarkən bütün risklər səfərin məqsədindən asılı olmayaraq təminat altına alınmalıdır.  Bu təhsil məqsədiylə, yaxud sadəcə turistik səyahət ola bilər, həmçinin, xizək sürmə, idman yarışları ola bilər: bütün səfər edən xarici vətəndaşlar səyahət sığortası almalıdırlar. Həmin sığortanın təminatı 30.000 laridir. Getdiyi günlərin sayını özündə əks etdirəcək sığorta müqaviləsi olmalıdır. Bu müqavilə ya gürcü dilində, ya da ki ingilis dilində tərtib edilməlidir".

Ekspert, Gürcüstanda  yarana biləcək hüquqi və praktiki nəticələr barədə də danışıb: "Hüquqi nəticələr o olacaq ki Gürcüstan höküməti bütün sərhəd keçid məntəqələrində bu sığorta müqaviləsini yoxlamalıdır və qanunvericiliyə uyğun olaraq sığorta müqaviləsi tələb edəcək. Praktiki tələb isə səyahət edən  şəxslərin tibbi xərclərinin öz üzərində saxlamayacağı, turizim haqqında qanunun təkmilləşdirilməsində gələn turistlərin daha rahat olması və baş verəcək ani hallarda özlərindən xərc çıxmamasıdır".

Ekspert səfər edən şəxslərə tövsiyyələrini verib: "Sığorta müqaviləsi əldə edərkən, şərtlərində təminat məbləğində 30.000 avro olmalıdır. Olduqları günün sayını müəyyən etməlidirlər. Səfər etdikləri vaxt planladıqları gündən daha artıq qalmalı olurlarsa  həmin ölkədən  onlayn qaydada öz ölkələrindən səfər sığortasının müddətini artıra bilərlər".

Soydaş təşkilatının sədri Kamran Ramazanlı vurğulayıb ki, qeyd olunan qərar Gürcüstan hökuməti və parlamentinin qəbul etdiyi qərardır. 1 yanvar 2026-cı ildən etibarən Gürcüstana gələn xarici vətəndaşlar sığorta almalıdır: "Bu, əslində, tibbi sığorta olmalıdır və tibbi sığortanın əhatə məbləği təxminən 30.000 lari civarında olmalıdır. Orada qeyd olunur ki, müəyyən tibbi xidmətlər,  hər hansı qəza və ya bədbəxt hadisə baş verərsə, həmin şəxs bu tibbi sığortadan yararlana bilər. Sığortanın, müxtəlif məbləğləri var. Amma bu məbləğlər də çox böyük deyil. Təxminən Azərbaycan manatı ilə hesabladıqda bir aylıq sığorta 50 manatdan yuxarı, 70 manata qədər dəyişir. Gürcü larisinə nisbətdə də belə bir uyğunlaşdırma var.

Təbii ki, Gürcüstanda doğulmuş Azərbaycan vətəndaşları üçün gediş-gəliş çoxdur. Quru yollar bağlı olduğu üçün hava nəqliyyatından istifadə edənlər çoxdur və bu da maliyyə xərclərini artırır. Bildiyimiz kimi, təyyarə biletləri bahadır.

Bir tərəfdən də bu sığortanın olması, əlbəttə, insanlarımızın, soydaşlarımızın xərclərini daha da artırır. Digər tərəfdən i müsbət cəhət var ki,  hər hansı bədbəxt hadisə baş verərsə, bu sığortadan yararlanmaq mümkündür və müxtəlif tibbi xidmətlər nəzərdə tutulur.

Burada səyahət sığortasından yox, tibbi sığortadan söhbət gedir. Əsasən Gürcüstan tərəfinin tələb etdiyi tibbi sığortadır və bu da qaydalarda açıq şəkildə göstərilir. Əgər bu sığorta olmazsa, həmin şəxslər cərimə oluna və ya səyahətdən geri qaytarıla bilərlər. Cərimə təxminən 200  manat məbləğindədir. Yaxud da ölkəyə girişə icazə verilməyə bilər".

Ekspert,  Borçalı əsilli şəxslərin gedib-gəlməsi məsələsinə də toxunub: "Borçalı əsilli insanların gedib-gəlməsi məsələsinə gəlincə, Borçalıdan Azərbaycana gələn şəxslərdən Azərbaycan tərəfi sığorta tələb etmir. Sığortanı tələb edən Gürcüstan tərəfidir və bu tələb Azərbaycan vətəndaşlarına şamil olunur. Borçalı əsilli Azərbaycan vətəndaşlarının sayı kifayət qədər çoxdur. Quru sərhədlərin bağlı olması səbəbindən təyyarə biletləri də bahadır və gedib-gəlmək böyük məsrəflər tələb edir. Bunun üzərinə sığorta xərcləri də əlavə olunur ki, bu da insanların maddi vəziyyətinə ciddi təsir göstərən faktordur.

Yəni həm quru yolların bağlı olması, həm də sığortanın tətbiqi soydaşlarımıza əlavə yük yaradır".

K.Ramazanlı həmçinin qeyd edib ki, Azərbaycan Respublikasının vətəndaşları Gürcüstan qanunvericiliyinə görə ölkədə  365 gün müddətində qala bilərlər: "Əgər 365 gündən bir gün artıq qalsalar, onlar 3000 lari cərimə olunurlar və 3 il müddətinə ölkədən xaric edilirlər. Həmçinin, qarışıq nikah əsasında Gürcüstanda, eyni zamanda Azərbaycanda yaşayan ailələr  mövcuddur. Bu ailələr üçün,  bir aylıq sığorta paketi əlverişli deyil. Onlar 6 aylıq və ya bir illik sığorta almalıdırlar. Burada tibbi sığortadan söhbət gedir. Buna görə də Gürcüstanın sığorta şirkətləri 6 aylıq və bir illik sığorta paketləri ilə bağlı münasib qiymətlərin formalaşdırılması üzərində çalışırlar ki, sığorta çox baha başa gəlməsin. Bu istiqamətdə işlər gedir, ancaq hələlik konkret qərar qəbul olunmayıb və rəsmi elan edilməyib".

Fatimə Məmmədova