Davosda Prezident İlham Əliyev bir neçə ildir ki, qalib dövlətin rəhbəri kimi qəbul olunur - RƏY
Azərbaycan Prezidenti İlham Əliyev Davosda "Euronews" televiziyasına müsahibəsində bildirib ki, Cənubi Qafqaz yeni inkişaf mərhələsinə daxil olur. Bu fikir regionda geosiyasi və iqtisadi dinamikanın əhəmiyyətli transformasiyasının göstəricisidir. Dövlət başçısının vurğuladığı bu yeni mərhələ yalnız iqtisadi əməkdaşlıq və nəqliyyat dəhlizlərinin genişlənməsi ilə məhdudlaşmır, eyni zamanda region ölkələrinin sülh və stabillik şəraitində qarşılıqlı əlaqələrinin möhkəmlənməsini də əhatə edir. Prezidentin bu çıxışı bir sıra mühüm suallar doğurur: Cənubi Qafqazda formalaşan yeni inkişaf mərhələsi konkret olaraq hansı imkanları və perspektivləri nəzərdə tutur və Azərbaycan bu dəyişikliklərdə hansı rol oynayır?
Mövzu ilə bağlı Milli Məclisin deputatı Məzahir Əfəndiyev Crossmedia.az-a açıqlama verib: "Azərbaycan Prezidentinin bu il Davosda həyata keçirdiyi səfər sözün əsl mənasında dünya siyasi arxitekturasının yeniləndiyi və beynəlxalq sistemin tamamilə yeni çağırışlar qarşısında dayandığı bir dövrə təsadüf edir. Prezident İlham Əliyev artıq növbəti dəfə Davosda keçirilən ənənəvi Dünya İqtisadi Forumunda iştirak etməklə təkcə Azərbaycanın iqtisadi dayanıqlılığının təmin olunması istiqamətində deyil, eyni zamanda Cənubi Qafqazda daha düzgün və səmərəli nəqliyyat dəhlizlərinin formalaşdırılması, Avropa ilə Asiya arasında mövcud logistika imkanlarının dəyərləndirilməsi baxımından mühüm mesajlar verir. Bu kontekstdə Azərbaycan Avropanın qaz və enerji resurslarına olan tələbatının ödənilməsi istiqamətində xüsusi bir mediator rolunu üzərinə götürməklə yanaşı, böyük ticarət marşrutlarının formalaşmasında Cənubi Qafqazda lider dövlət olduğunu bir daha nümayiş etdirir. Bu gün artıq Davosda Prezident İlham Əliyev bir neçə ildir ki, qalib dövlətin rəhbəri kimi qəbul olunur və beynəlxalq təşkilatların, eləcə də müxtəlif dövlətlərin rəhbərlərinin Prezidentlə görüşə göstərdiyi böyük maraq bunu açıq şəkildə təsdiqləyir".
Deputat əlavə edib ki, xüsusilə Fransa və İsrail kimi ölkələrin dövlət rəhbərlərinin cənab Prezidentlə Davosda görüşlər keçirməsi onu göstərir ki, bu gün Azərbaycan böyük dövlətlərin qarşılaşdığı yeni çağırışların dəstəklənməsində və beynəlxalq əməkdaşlığın inkişafında xüsusi rol oynayır: "Bu yanaşma bilavasitə Azərbaycanın həyata keçirdiyi balanslı və praqmatik xarici siyasətin nəticəsidir. Digər tərəfdən, Azərbaycan indiyədək apardığı xarici siyasətdə əsas hədəf kimi qarşılıqlı hörmət prinsiplərinə əsaslanan münasibətlərin qurulmasını, sülhün qorunmasını və bu məqsədlə irəli sürülən təşəbbüslərin təkcə bəyanatlar səviyyəsində deyil, konkret layihələr üzərindən icra olunmasını prioritet kimi müəyyənləşdirib. Bütün bunların fonunda aydın görünür ki, həm dünyada, həm də xüsusilə Cənubi Qafqazda yeni bir mərhələnin başlanğıcı formalaşır. Bu mərhələ millətlərin maraqlarını əks etdirən böyük ticarət layihələrinin reallaşdırılması, logistika imkanlarının daha da genişləndirilməsi və nəticə etibarilə davamlı sülhün təmin olunması məqsədini daşıyır. Gürcüstan, Ermənistan və Azərbaycan Cənubi Qafqazın əsas subyektləri kimi bundan sonra sülh, sabitlik və əmin-amanlıq şəraitində birgə yaşayış mərhələsinə qədəm qoymalıdırlar".
Ayhan
10:37 22.01.2026
Oxunuş sayı: 1752
