Azərbaycan Prezidenti Davosda kimə və hansı mesajları verib - Deputat danışdı
Azərbaycan Prezidenti İlham Əliyev yanvarın 20-də Davosda "Euronews" televiziyasına müsahibəsində bildirib ki, beynəlxalq münasibətlər bu gün yeni eraya qədəm qoyur: "Bu erada vəziyyəti qanunun aliliyi deyil, güc qaydası idarə edir. Biz bunu dünyanın müxtəlif yerlərində görə bilərik".
"Hər ölkə öz strategiya və siyasətini özünün potensialına uyğunlaşdırmalıdır, o cümlədən mümkün qədər çox ölkələrlə, ilk növbədə öz bölgəsində, sonra isə qlobal müstəvidə yaxşı münasibətlər qurmalıdır. Azərbaycan məhz buna nail oldu", - deyə dövlət başçısı qeyd edib.
Prezident artıq beynəlxalq hüquq normalarının dünya ictimaiyyətinin bütün üzvləri üçün mütləq görünmədiyini də bildirib.
"Buna görə strateji məqsədimiz milli maraqlar əsasında nəticələri əldə etməkdən ibarət idi və beynəlxalq hüquqa tam riayət edərək düzgün hesab etdiyimizi həyata keçirmək idi. Gördüyümüz hər bir iş - istər siyasi inkişaf, istərsə də suverenliyimizin və ərazi bütövlüyümüzün bərpası beynəlxalq hüquqa və ümumi dəyərlərə uyğun idi".
Dövlət başçısının Davosdan verdiyi mesajlar barədə Crossmedia.az-a danışan Milli Məclisin deputatı Vüqar Bayramov deyib ki, Azərbaycan Prezidenti "Euronews" televiziya kanalına verdiyi müsahibədə, eləcə də yeni zamanda Davos İqtisadi Forumunda keçirilən panel müzakirəsi zamanı bir sıra mühüm məqamlara toxunub: "Çıxışı zamanı dövlət başçısı qlobal geosiyasi vəziyyətə münasibət bildirərək qeyd edib ki, beynəlxalq münasibətlər artıq yeni mərhələyə qədəm qoyub. Azərbaycan Prezidenti həm "Euronews" kanalına müsahibəsində, həm də Davos İqtisadi Forumunda keçirilən paneldə qlobal siyasi proseslər fonunda formalaşan yeni reallıqlara diqqət çəkib və mövcud beynəlxalq münasibətlər sisteminin əvvəlki mərhələdən fərqləndiyini vurğulayıb”.
Ayhan
10:25 22.01.2026
Oxunuş sayı: 1461
