Gündəm

Azərbaycan- Çin əməkdaşlığı perspektiv üçün nə vəd edir? -RƏY

Azərbaycan Prezidenti İlham Əliyev yanvarın 5-də yerli televiziya kanallarına müsahibəsində bildirib ki, Azərbaycanla Çin arasında bir il ərzində strateji, sonra isə hərtərəfli strateji tərəfdaşlıq haqqında iki sənədin imzalanması ikitərəfli iqtisadi əlaqələrin inkişafına böyük təkan verib.

Ölkələrimiz arasında əmtəə dövriyyəsinin həcminin 4 milyard dolları keçdiyini vurğulayan Prezident İlham Əliyev Çin şirkətlərinin Azərbaycanda bərpaolunan enerji, nəqliyyat və digər sahələrə fəal şəkildə investisiyalar qoymağa başladığını qeyd edib.

Azərbaycanın bu regionda Çin üçün prioritet tərəfdaş olduğunu deyən dövlət başçısı əldə olunmuş siyasi razılaşmalar çərçivəsində hərbi-texniki əməkdaşlığa başlandığını qeyd edib.

"Bu əməkdaşlığın bir hissəsi hərbi paradda nümayiş etdirilib, amma bu, yalnız başlanğıcdır. Biz bu halda böyük qarşılıqlı maraq görürük. Bundan əlavə, hərbi texnikanın əldə olunması ilə kifayətlənməyərək, biz müştərək müəssisələrin yaradılması üzərində işləyirik və bu sahədə işlər artıq başlayıb", - deyə Prezident İlham Əliyev vurğulayıb.

Bakı ilə Pekin arasında münasibətlər perspektivi barədə türkiyəli politoloq Hüseyn Şeyhanlıoğlu Crossmedia.az-a danışıb: "Fikrimcə, Çin Azərbaycanla hərbi əməkdaşlığı orta tempdə qoruyacaq. Çünki Çin silahları ilə bağlı hələ müəyyən tərəddüdlər var. Yəni bu silahlar tam etibar qazanmayıb. Üstəlik, Azərbaycan Rusiya ilə yaxınlığı ilə seçilir. Pekin bu faktoru da nəzərə alacaq. Növbəti bir məqam isə ondan ibarətdir ki, Çin hərbi gücdən çox, iqtisadi əməkdaşlığa inkişaf verir. Bu mənada ölkələr arasında iqtisadi əməkdaşlığın inkişafı daha real görünür".

🖨 Çap et

12:13 07.01.2026

Oxunuş sayı: 2595