ABŞ mətbuatı 907-ci düzəlişin tam ləğvinin vacibliyindən yazıb
ABŞ-nin The Washington Times qəzetində 907-ci düzəlişin tam şəkildə ləğv edilməsinin əhəmiyyətinə həsr olunmuş məqalə dərc olunub.
Crossmedia.az bu barədə The Washington Times qəzetinə istinadən xəbər verir.
Məqalədə qeyd olunur ki, ABŞ Prezidenti Donald Trampın vasitəçiliyi ilə Azərbaycan və Ermənistan arasında əldə olunan sülh razılaşmaları Cənubi Qafqazda vəziyyəti köklü şəkildə dəyişir və Konqresdə mövcud olan etirazlara baxmayaraq, Amerikanın strateji maraqlarına xidmət edir.
Yazıda vurğulanır ki, avqust ayında imzalanan Vaşinqton razılaşmaları region üçün kritik əhəmiyyət daşıyan nəqliyyat dəhlizlərini açır və ABŞ ilə Cənubi Qafqaz ölkələri arasında tərəfdaşlıq münasibətlərini daha da dərinləşdirir.
Bildirilir ki, Prezident Tramp icraedici səlahiyyətlərindən istifadə edərək “soyuq müharibə dövründən qalan” məhdudiyyətlərdən imtina edib, onun Konqresdəki müttəfiqləri isə bu məhdudiyyətlərin tam ləğvi istiqamətində fəaliyyət göstərirlər.
Prezidentin köməkçisi Hikmət Hacıyev qəzetə açıqlamasında Tramp administrasiyasının sülh gündəliyinə sadiqliyini yüksək qiymətləndirərək bildirib:
“Tramp administrasiyası sülh gündəliyimizə böyük sədaqət nümayiş etdirib. Əsas qiymətləndirilməli məqam dərhal qarşılıqlı münasibət və Prezident Trampın tam şəkildə prosesə cəlb olunmasıdır.”
Məqalədə qeyd olunur ki, Tramp administrasiyası Azərbaycanı ABŞ və İsrailin maraqları ilə bağlı etibarlı tərəfdaş kimi görür. Bununla belə, Azərbaycan–İsrail münasibətləri senator Adam Şiff kimi bəzi tənqidçilərin narazılığına səbəb olur.
Xatırladılır ki, Şiff aprel ayında, Trampın sülh razılaşmasından bir neçə ay əvvəl, Azərbaycanı “Osmanlı imperiyasının guya soyqırımı siyasətini təkrarlamaqda” ittiham edib və 2023-cü ildə keçirilən antiterror tədbirlərini “etnik təmizləmə” kimi təqdim edib.
Bununla yanaşı, Şiffin oktyabr ayında müdafiə büdcəsinə daxil etməyə çalışdığı anti-Azərbaycan düzəlişi qəbul edilməyib. Məqalədə bu fakt Konqresdə Tramp administrasiyasının regional diplomatiyasını çətinləşdirəcək addımlara marağın azaldığının göstəricisi kimi qiymətləndirilir.
Qeyd olunur ki, məqalənin tam mətni The Washington Times qəzetinin rəsmi saytında yerləşdirilib.
Günel Verdiyeva
14:50 03.01.2026
Oxunuş sayı: 3818
