Gündəm

Gizir və miçmanların ehtiyatda qalma müddətinin artırılması Silahlı Qüvvələrin peşəkarlığını gücləndirəcək – Ekspert

Azərbaycanın hərbi qanunvericiliyində aparılan dəyişikliklər ölkənin müdafiə sisteminin daha səmərəli və uzunmüddətli fəaliyyət göstərməsini təmin etməyə yönəlib. Prezident İlham Əliyevin təsdiqlədiyi son qərarlar çərçivəsində gizir və miçmanlar üçün ehtiyatda olma yaş hədləri artırılıb. Bu dəyişiklik, xüsusi təyinatlı hərbi təhsil müəssisələrində və xarici analoji təhsil müəssisələrində ixtisaslaşmış hərbi qulluqçuların bilik və bacarıqlarından daha uzun müddət istifadə olunmasına imkan yaradır. Yeni qanunvericilik həmçinin ehtiyatda olan hərbi qulluqçuların yaş hədlərini konkretləşdirərək, onların ölkənin müdafiəsində iştirak imkanlarını genişləndirir.

Bu barədə Crossmedia.az-a danışan hərbi ekspert Ədalət Verdiyev bildirib ki, həqiqi hərbi xidmətdən ehtiyata buraxılan hərbi qulluqçular müəyyən bir yaş həddinə qədər ehtiyatda qalırlar: "Bu, Silahlı Qüvvələrimizin peşəkar ehtiyat fondunu təşkil edir. Gizir və miçmanların da hərbi xidmətdən sonra ehtiyatda olma müddətlərinin artırılması onların peşəkar imkanlarından daha uzun müddət istifadə etmək zərurəti ilə əlaqədar qəbul edilən bir qərardır. Bu qərarın qəbul edilməsi Silahlı Qüvvələrimizin daha çox sayda zabit və gizirdən daha uzun müddət ehtiyatda yararlana bilməsinə imkan verəcək".