Azərbaycanda gender bərabərliyi güclü və davamlıdır- Sosioloq
Azərbaycan Respublikasında gender bərabərliyinin təmin edilməsi və gender əsaslı zorakılığın qarşısının alınması dövlət siyasətinin prioritet istiqamətlərindən biridir. Bu məqsədlə 2026–2028-ci illər üçün Gender Bərabərliyi üzrə Milli Fəaliyyət Planı hazırlanmış və onun icrasında əsas rol Ailə, Qadın və Uşaq Problemləri üzrə Dövlət Komitəsinə həvalə edilmişdir. Plana uyğun olaraq, mərkəzi və yerli səviyyədə dövlət orqanlarının nümayəndələrindən ibarət, ictimai əsaslarla fəaliyyət göstərən Gender bərabərliyi üzrə əlaqələndirmə qrupları yaradılacaq. Eyni zamanda, ölkədə gender əsaslı zorakılıq mövzusunda sorğu aparılacaq və nəticələr əsasında təhlil və yekun hesabat hazırlanaraq müvafiq siyasətlərin inkişafına töhfə veriləcək.
Mövzu barədə 
Crossmedia.az-a bildirib ki, Azərbaycanda gender bərabərliyi istiqamətində çox böyük işlər görülüb: "Bu, 2026–2028-ci illərdə qəbul olunan Milli Fəaliyyət Planı ilk sənəd deyil. 2006-cı ildən başlayaraq Azərbaycan qadın hüquqlarının qorunması ilə bağlı bir sıra qanunlar qəbul edib, BMT-nin konvensiyalarına qoşulub və qadınlarla bağlı dövlət strategiyasını həyata keçirir".
O, qeyd edib ki, qadınlara qarşı hər cür ayrı-seçiliyə qarşı hüquqi sənədlər qəbul olunub və məişət zorakılığı ilə bağlı qanun 2010-cu ildə təsdiqlənib: "Qadınlar bu gün cəmiyyətdə, ictimai-siyasi həyatda və dövlət idarəçiliyində kişilərlə bərabər təmsil olunurlar. Səhiyyə sistemində 80%-ə yaxın, təhsil sahəsində isə 75–80%-ə yaxın qadın iştirak edir. Qanunvericilik orqanında qadınların təmsilçiliyi 20%-dən yuxarıdır, məşğul əhalinin isə 48%-dən çoxunu qadınlar təşkil edir".
Sosioloq əlavə edib ki, 2023-cü ildə Nazirlər Kabineti qadınların bəzi iş sahələrində işləməsini qadağan edən məhdudiyyətləri ləğv edib: "Əvvəlcə qadınların işləməsi qadağan olunan 774 sahədən 204-də bu qadağa aradan qaldırılıb. Bu, qadınlara qarşı pozitiv diskriminasiyadır və onların sağlamlığına zərər verən iş sahələri məhdudlaşdırılıb. İKT və yeni texnologiyalar sahələrində isə qadınların işləməsinə heç bir qadağa qoyulmayıb".
Ü. Şəfiyev vurğulayıb ki, 2026–2028-ci illər üçün Milli Fəaliyyət Planı gender bərabərliyi siyasətinin davamlılığını və dayanıqlığını göstərir: "Azərbaycanda gender bərabərliyi ilə bağlı dövlət səviyyəsində ciddi problem yoxdur. Sadəcə, cəmiyyətdə bəzi stereotiplər mövcuddur. Bu stereotiplərin aradan qaldırılması üçün sosial maarifləndirmə və tədqiqat işləri aparılır. Eyni zamanda qadınların qərar qəbul etmə sistemində iştirakının artırılması da vacibdir".
Sosioloq əlavə edib ki, Milli Fəaliyyət Planı çərçivəsində təhsil ocaqlarında gender tədrisinin həyata keçirilməsi nəzərdə tutulur: "Bu, cəmiyyətdə köhnə stereotiplərin aradan qaldırılmasına xidmət edəcək. Fəaliyyət planında nəzərdə tutulan tədbirlər Azərbaycanda gender bərabərliyinin daha da güclənməsinə imkan yaradacaq. Azərbaycan bu sahədə digər ölkələr üçün nümunə ola bilər".
Müsahibimiz qeyd edib ki, tarixi baxımdan da Azərbaycan qadınları kişilərlə bərabər çalışıb və ölkədə qadınlara münasibət həmişə yüksək səviyyədə olub: "Artıq qadınlar ictimai-siyasi həyatda aktiv iştirak edir, onların təhsil və qərar qəbul etmə sistemində iştirakı artır. Bu, göstərir ki, gender bərabərliyi sahəsində Azərbaycan kifayət qədər nümunəvi addımlar atmış ölkədir. Azərbaycan, həmçinin, qadın hüquqlarını tanıyan ilk Müsəlman Şərq ölkələrindən biridir. Gender Bərabərliyi üzrə Milli Fəaliyyət Planı, sosial maarifləndirmə, hüquqi islahatlar və hüquqi mexanizmlərin təkmilləşdirilməsi ilə gender bərabərliyi institutlaşmasını daha da möhkəmləndirəcək və bəzi mövcud problemləri aradan qaldıracaq".
Mehriban Yariyeva
13:36 31.12.2025
Oxunuş sayı: 2046
