Yaxın bir-iki il ərzində ağdamlılar öz doğma yurdlarında dünyanın ən xoşbəxt insanları kimi yaşayacaqlar - RƏY
Uzun illər işğal və dağıntılarla yadda qalan Ağdam rayonu bu gün artıq dirçəliş və bərpa mərhələsinə qədəm qoymuşdur. Azad edilmiş ərazilərdə həyata keçirilən genişmiqyaslı quruculuq və yenidənqurma işləri nəticəsində vaxtilə viran qoyulmuş şəhər və kəndlərdə həyat yenidən canlanır.
Bu proses təkcə fiziki infrastrukturun bərpası deyil, eyni zamanda doğma yurdlarına qayıdan insanların ümidlərinin, inamının və gələcəyə baxışının bərpasıdır.
Məhz bu tarixi mərhələnin real nəticələrini əks etdirən məqamlardan danışan Prezident İlham Əliyev Ağdam şəhərinə köçən sakinlərlə görüşü zamanı rayonda artıq həyatın bərpa edildiyini, bir neçə kənddə minlərlə insanın məskunlaşdığını və köç prosesinin mərhələli şəkildə davam etdiyini vurğulamışdır. Dövlət başçısının bu fikirləri işğaldan azad olunmuş ərazilərdə aparılan dövlət siyasətinin məqsədyönlü, ardıcıl və insan mərkəzli xarakter daşıdığını bir daha nümayiş etdirir.
Bakı Dövlət Universitetinin Milli mətbuat tarixi kafedrasının müdiri, professor Cahangir Məmmədli bu barədə Crossmedia.az-la öz fikirlərini bölüşüb:
"Cənab Prezidentimizin səfərlərini, xüsusilə Qarabağa etdiyi bütün səfərləri diqqətlə izləyirəm. Onun Ağdama səfəri, orada yeni salınan yaşayış məhəlləsində sakinlər, ağsaqqallar və yerli ictimaiyyət nümayəndələri ilə keçirdiyi görüş məndə olduqca dərin və güclü təəssürat yaratdı. Hətta elə hiss etdim ki, sanki mən də həmin görüşdə şəxsən iştirak edirəm.
Cənab Prezident Ağdamda görülən işləri bir-bir sadalayarkən aydın oldu ki, bu rayon faktiki olaraq tamamilə yenidən qurulur. Görülən işlərin miqyası çox genişdir. Prezident özü də vurğuladı ki, sadalananlar hələ görülən işlərin hamısı deyil. Bu fakt bir daha göstərdi ki, Ağdam bu gün böyük bir quruculuq və dirçəliş mərhələsindən keçir.
Bu məqamda cənab Prezidentin təxminən bir il əvvəl söylədiyi bir fikri xatırladım. O zaman demişdi ki, Ağdam Azərbaycanın Ankarası olacaq. Yəni Ağdam gələcəkdə strateji, iqtisadi və sosial baxımdan xüsusi önəm daşıyan bir mərkəzə çevriləcək. Bu günlərdə baş tutan görüş zamanı da açıq şəkildə hiss olundu ki, Prezident Ağdamın quruculuq prosesinə şəxsən böyük diqqət və qayğı göstərir.
Əminliklə demək olar ki, yaxın illərdə – bütün ağdamlılar, vaxtilə doğma yurdlarını tərk etməyə məcbur qalmış insanlar öz torpaqlarına qayıdacaqlar və tamamilə yeni, müasir Ağdam formalaşacaq. Bu Ağdam artıq real şəkildə tikilməkdədir və onun böyük bir hissəsi artıq istifadəyə hazırdır".
Professor, həmçinin prezidentin Ağdamda müxtəlif sənaye müəssisələrinin açılışında iştirakı, yeni istehsal sahələrinin yaradılması, insanların işlə təmin olunması onu göstərir ki, bu bölgəyə qayıdan vətəndaşları sabit məşğulluq və layiqli həyat şəraiti gözlədiyini deyib:
"Sözün əsl mənasında yaxın bir-iki il ərzində ağdamlılar öz doğma yurdlarında dünyanın ən xoşbəxt insanları kimi yaşayacaq və çalışacaqlar.
Çünki bu gün mənim Prezidentim həmin insanların öz torpaqlarına qayıtması, normal və firavan həyat qurması üçün əlindən gələni əsirgəmir. Dünən Ağdamda səsləndirilən faktlar, keçirilən görüşlər və atılan addımlar bunun bariz sübutudur. Allah Prezidentimizi var etsin".
09:40 26.12.2025
Oxunuş sayı: 1288
