Partiya sədri: Bizim ABŞ - dən gözləntimiz budur ki...
Azərbaycan-ABŞ enerji əməkdaşlığının yeni mərhələdə inkişafı ilə bağlı məsələlər müzakirələr yeni mərhələyə daxil olur.
Bu barədə müzakirələr energerika naziri Pərviz Şahbazovla ABŞ-nin Azərbaycandakı müvəqqəti işlər vəkili Emi Karlon arasında keçirilən görüş zamanı aparılıb.
Görüşdə Vaşinqtonda Azərbaycanla əlaqələrin inkişafına böyük maraq və müsbət münasibətin olduğu qeyd edilib.
Bu çərçivədə energetika nazirinin ABŞ-yə səfərinin nəticələri nəzərdən keçirilib. İki ölkə arasında Strateji Tərəfdaşlıq Xartiyasının enerji istiqaməti, "Beynəlxalq Sülh və Rifah naminə Tramp Marşrutu" (TRIPP), müxtəlif istiqamətli enerji layihələri və digər prioritet sahələr üzrə əməkdaşlığa dair fikir mübadiləsi aparılıb.
ABŞ şirkətləri ilə enerji sahəsində əməkdaşlığın genişləndirilməsi perspektivlərinə, enerji sahəsində mütəmadi dialoq mexanizminin yaradılması və əhatəli "yol xəritəsi"nin hazırlanması məsələlərinə toxunulub.
Azərbaycanla ABŞ arasında enerji sahəsində strateji tərəfdaşlıq münasibətləri yeni mərhələyə qədəm qoyur. Qlobal enerji təhlükəsizliyi və alternativ enerji mənbələrinin inkişafı fonunda iki ölkə arasında əməkdaşlığın dərinləşdirilməsi xüsusi aktuallıq kəsb edir. Bu kontekstdə aparılan son müzakirələr qarşılıqlı maraqların genişliyini və tərəflərin enerji sahəsində uzunmüddətli, sistemli əməkdaşlığa verdiyi önəmi bir daha nümayiş etdirir.
İki ölkə arasında enerji sajəsində əməkdaşlıq barədə Crossmedia.az-a danışan iqtisadçı- ekspert, ReAL partiyasının sədri Natiq Cəfərli bildirib ki, Azərbaycanla ABŞ arasındakı münasibətlərin artan templə inkişaf etməsi ölkəmizin həm iqtisadiyyatına, həm də təhlükəsizliyinə mühüm töhfə verir.
Onun sözlərinə görə, Azərbaycan enerji təhlükəsizliyi məsələsində həm Avropa, həm də ABŞ üçün etibarlı və strateji tərəfdaş kimi çıxış edir: "Hazırkı mərhələdə əsas hədəflərdən biri ABŞ-dən Azərbaycana daha çox texnologiya və investisiyanın cəlb edilməsidir. Bizim gözləntimiz ondan ibarətdir ki, ABŞ şirkətləri Azərbaycanda daha geniş şəkildə təmsil olunsun. Nə qədər çox iştirak olarsa, bir o qədər yeni texnologiyaların və investisiyaların ölkəmizə gəlməsi üçün şərait yaranacaq”.
N.Cəfərli vurğulayıb ki, bu proses təkcə enerji sektoruna deyil, ümumilikdə iqtisadiyyatın digər sahələrinə də müsbət təsir göstərə bilər: “ABŞ şirkətlərinin iştirakı Azərbaycanın enerji sektorunda rəqabət qabiliyyətini artırmaqla yanaşı, alternativ və bərpa olunan enerji sahəsində də yeni imkanlar açır. Azərbaycan–ABŞ enerji əməkdaşlığının dərinləşdirilməsi regional enerji təhlükəsizliyinin möhkəmlənməsinə xidmət etməklə yanaşı, ölkəmizin qlobal enerji bazarındakı mövqelərini daha da gücləndirəcək".
Mehriban Yariyeva
10:07 25.12.2025
Oxunuş sayı: 3714
