Prezident İlham Əliyev öz fəaliyyətində azərbaycançılığın əsas prinsiplərini əks etdirir - Deputat

Azərbaycan Respublikasının Prezidenti İlham Əliyev müasir Azərbaycanın inkişafında, ölkəmizin dayanıqlı iqtisadi və siyasi uğurlarının əldə olunmasında mühüm rol oynayan liderlərdən biridir.

İlham Əliyevin rəhbərliyi altında Azərbaycan iqtisadi sahədə sürətli inkişaf yoluna qədəm qoymuş, sosial sahədə vətəndaşların rifahı yüksəldilmiş, beynəlxalq arenada isə ölkəmizin nüfuzu artırılmışdır. Eyni zamanda, o, Azərbaycanın tarixi və mədəni irsini qorumağa, regiondakı sabitliyin təmin edilməsinə və əhalinin təhlükəsizliyinə xüsusi diqqət yetirir.

Milli Məclisin deputatı Nigar Məmmədova Crossmedia.az-a bildirib ki, 2003-cü il oktyabrın 15-də keçirilmiş seçkilərdə Azərbaycan Respublikasının Prezidenti seçilmiş  İlham Əliyev Ümummilli Lider Heydər Əliyevin siyasi irsini davam etdirərək dövlətimizi strateji hədəflərə doğru uğurla aparmaqdadır: "Cənab Prezident həmişə cəmiyyətin, dövlətin maraqlarını əsas tutaraq, siyasi məharəti və yüksək mənəvi keyfiyyətləri ilə hər kəsin rəğbətini və hörmətini qazanmış, həm ölkə daxilində, həm də beynəlxalq aləmdə böyük nüfuz əldə etmişdir.  İlham Əliyev keçmiş ənənələr üzərində müasir ölkəmizin yeni reallıqlarını yaradaraq hər zaman güclü və müstəqil Azərbaycan naminə çalışmışdır. Milli-mənəvi dəyərlərə bağlılıq, müstəqillik ideyalarına sadiqlik, azərbaycançılıq məfkurəsinə ali münasibət, Vətən və Xalq sevgisi cənab Prezidentin lider kimi əsas keyfiyyətləridir. 22 illik prezidentlik fəaliyyəti dövründə xalqa xidmət etmək, hər bir azərbaycanlının Prezidenti olmaq dövlət başçımızın həyat fəlsəfəsidir. Prezident İlham Əliyevin Azərbaycanın müstəqillik dayaqlarının möhkəmləndirilməsi ilə bağlı fəaliyyəti ölkəmizin qazandığı uğurların əsas təminatçısıdır. O, hakimiyyətə gəldiyi ilk gündən Azərbaycanın ərazi bütövlüyü və suverenliyinin bərpasını fəaliyyətinin əsas hədəfi kimi müəyyən etmişdir".

Deputat qeyd edib ki, 44 günlük Vətən müharibəsinə qədər Azərbaycan Prezident İlham Əliyevin rəhbərliyi altında daha da güclənmiş, böyük Qələbəyə yaxınlaşmışdır: "2020-ci ildə Azərbaycan 30 ilə yaxın davam edən işğala son qoymuş, Vətən müharibəsi nəticəsində Azərbaycanın ərazi bütövlüyü bərpa edilmiş, üç il sonra uğurla reallaşan antiterror əməliyyatları nəticəsində isə dövlət suverenliyimiz möhkəmlənmişdir. Prezident İlham Əliyev Qarabağı işğaldan azad etməklə ədaləti və beynəlxalq hüququ bərpa etmişdir.  Azərbaycanın əldə etdiyi böyük Qələbə regionda erməni faşizminin məğlubiyyətini təmin etmiş, regionda öz maraqlarını bərpa etmək istəyən destruktiv qüvvələrin planlarını alt-üst etmişdir. Prezident İlham Əliyev regionda və dünyada yeni reallıq yaratmış və bu reallıqla indi hər kəs hesablaşır. Dövlət başçısı bu Qələbə ilə xalqımızın Ümummilli Lideri Heydər Əliyevin arzularını həyata keçirmişdir".

Deputat əlavə edib ki, artıq Ermənistan da Azərbaycanın ərazi bütövlüyünü tanıyıb: "İndi Cənubi Qafqazda bütün məsələlər Azərbaycan dövlətinin iradəsi ilə həll olunur. Vətən müharibəsində qazanılan Qələbə Azərbaycanın siyasi, iqtisadi və hərbi gücünü nümayiş etdirmişdir. Prezident İlham Əliyevin qurduğu iqtisadi və sosial idarəetmə modeli neft gəlirlərinin səmərəli idarə olunmasına, qeyri-neft sektorunun gücləndirilməsinə, insan rifahının yüksəldilməsinə və dövlətin strateji gücünün artırılmasına xidmət edir. Prezident İlham Əliyev fəaliyyətində Azərbaycan xalqının keçdiyi tarixi mərhələləri və azərbaycançılığın əsas prinsiplərini əks etdirir. Prezident İlham Əliyevin qədim tariximizə, şanlı keçmişimizə və zəngin mədəni irsimizə məhəbbəti və hörməti milli-mənəvi dəyərləri ictimai münasibətlərin mühüm komponentinə çevirmişdir. Azərbaycan Prezidenti dünyada İslam həmrəyliyi təşəbbüsünün müəllifi və multikulturalizm ənənələrinin böyük təbliğatçısıdır. Prezident İlham Əliyevin yürütdüyü siyasət müasir Azərbaycanın güclənməsinə, milli-mənəvi dəyərlərin qorunmasına xidmət edir. Azərbaycan xalqının tarixi Qələbəsi regionda formalaşmaqda olan yeni reallığın əsas səbəblərindən biridir. Prezident İlham Əliyev “Qərbi Azərbaycan” mövzusunu dövlət siyasəti və regionda formalaşan yeni reallığın ayrılmaz hissəsinə çevirmişdir.

O, qeyd edib ki, Prezident İlham Əliyevin uğurlu xarici siyasətinin vacib tərkib hissəsi olan Qərbi Azərbaycan məsələsinin beynəlxalq müstəviyə çıxarılması Ermənistanın Qarabağla bağlı absurd iddialarını dəf etməyə xidmət edir və Ermənistanla münasibətlərin normallaşması prosesində Azərbaycanın mövqeyini daha da gücləndirir: "Qarabağın və Şərqi Zəngəzurun bərpası və yenidən qurulması istiqamətində həyata keçirilən genişmiqyaslı işlər postmünaqişə dövründə tətbiq edilən ən sistemli yenidənqurma modellərindən biri kimi beynəlxalq təcrübə üçün mühüm nümunədir. Prezident İlham Əliyev 2025-ci ildə işğaldan azad olunmuş ərazilərə çoxsaylı səfərlər etmiş, genişmiqyaslı infrastruktur layihələrinin təməlini qoymuşdur. Son 5 ildə cənab Prezident azad olunmuş ərazilərdə müxtəlif tədbirlərdə iştirak etmiş, layihələrin təməlini qoymuş və yeni infrastruktur layihələrinin açılışını həyata keçirmişdir. Prezident İlham Əliyev sevincli günlərini hər zaman xalqla bölüşür. Müharibədən əvvəl doğum günlərində dövlət başçımız adətən sosial obyektlərin açılışında iştirak edir, məcburi köçkünlər və şəhid ailələri ilə görüşürdü. Hər dəfə də onları əmin edirdi ki, doğma yurdları mütləq işğaldan azad olunacaq. 44 günlük Vətən müharibəsindən sonra dövlət başçımız doğum günlərini azad olunmuş Qarabağ və Şərqi Zəngəzurda xalqla birlikdə qeyd edir. Bu dəfəki doğum günü ərəfəsində Prezident İlham Əliyev Qarabağda yeni infrastruktur layihələrinin açılışını edib, Xankəndi və Kərkicahan qəsəbəsində buraya köçən sakinlərlə görüşüb. Dövlət başçısı 34 ildən sonra öz doğma yurduna qayıdan soydaşlarımızla görüşdə bəyan edib ki, “1991-ci il dekabrın sonunda Ermənistan dövləti sizi öz dədə-baba torpağınızdan didərgin salmışdı… indi 2025-ci il dekabrın sonunda ədalət burada da, bu torpaqda da tam bərqərar olur.”

Siyasətçi bildirib ki, bu gün beynəlxalq miqyasda Azərbaycan Prezidentinin sözü imzası qədər dəyərlidir və bir çox siyasi xadimlər onun uğur formulunu nümunə kimi göstərir: " Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən ardıcıl və məqsədyönlü siyasət nəticəsində ölkəmiz siyasi və makroiqtisadi baxımdan sabit, təhlükəsiz, regionun mühüm siyasi və iqtisadi mərkəzlərindən birinə çevrilmişdir. Dövlət siyasətinin mərkəzində Azərbaycan vətəndaşı dayanır. Prezident İlham Əliyevin rəhbərliyi ilə son illərdə həyata keçirilən islahatlar Azərbaycanı beynəlxalq aləmdə strateji tərəfdaş kimi mövqeyini möhkəmləndirmişdir. İqtisadiyyatın inkişafı və əhalinin sosial rifahının yüksəldilməsi məqsədilə icra olunan sosial-iqtisadi layihələr vətəndaşlarımızın həyat səviyyəsinin yaxşılaşmasına xidmət edir. Regionların sosial-iqtisadi inkişafı dövlət siyasətinin əsas prioritetlərindəndir və bu istiqamətdə icra olunan dövlət proqramları ölkə üzrə tarazlı inkişafın təmin edilməsində mühüm rol oynayır. Prezident İlham Əliyevin güclü xalq, güclü dövlət, güclü lider modeli müstəqil və müasir Azərbaycanın güc mənbəyidir. Azərbaycan bu gün dünyanın siyasi sistemində özünəməxsus yeri ilə seçilir".

Mehriban Yariyeva