Deputat: Prezident İlham Əliyevin 22 illik prezidentlik dövründə Azərbaycan iqtisadiyyatı təxminən 4 dəfə böyüyüb
Son illər Azərbaycan iqtisadiyyatında müşahidə olunan davamlı inkişaf təsadüfi xarakter daşımır. Bu proses Prezident İlham Əliyevin rəhbərliyi ilə həyata keçirilən məqsədyönlü, ardıcıl və dərin iqtisadi islahatların məntiqi nəticəsidir. Xüsusilə də son 22 il ərzində ölkənin iqtisadi göstəricilərində baş verən fundamental dəyişikliklər Azərbaycanın təkcə daxili imkanlarının genişlənməsinə deyil, eyni zamanda regionda aparıcı iqtisadi mövqeyinin möhkəmlənməsinə xidmət edib. Makroiqtisadi sabitliyin təmin olunması, investisiya mühitinin yaxşılaşdırılması və qeyri-neft sektorunun inkişafı üzrə atılan addımlar bu dövrün əsas səciyyəvi xüsusiyyətləri kimi çıxış edir.
Milli Məclisin deputatı Vüqar Bayramov Prezident İlham Əliyevin iqtisadi siyasəti ilə bağlı fikirlərini Crossmedia.az-la bölüşüb: "Prezident İlham Əliyevin 22 illik prezidentlik dövründə Azərbaycan iqtisadiyyatı təxminən 4 dəfə böyüyüb. Bu artım təkcə ümumi iqtisadi göstəricilərlə məhdudlaşmır, eyni zamanda əsas makroiqtisadi indikatorlarda da ciddi yüksəliş müşahidə olunub. Belə ki, xarici ticarət dövriyyəsi 11 dəfə, investisiyaların həcmi isə təxminən 30 dəfə artıb. Qeyd olunan göstəricilər açıq şəkildə onu deməyə əsas verir ki, son 22 il ərzində həyata keçirilən islahatlar Azərbaycan iqtisadiyyatının davamlı böyüməsinə və regionda aparıcı mövqeyə sahib olmasına real zəmin yaradıb. Bu baxımdan, islahatların dərinləşdirilməsi hər zaman prioritet istiqamət kimi müəyyən edilib. Prezident İlham Əliyevin rəhbərliyi dövründə bu sahədə ardıcıl və məqsədyönlü addımların atıldığını müşahidə edirik. İslahatların genişləndirilməsi fonunda qeyri-neft sektorunun iqtisadiyyatda payının əhəmiyyətli dərəcədə artması xüsusilə diqqət çəkir. Artıq qeyri-neft sektoru Azərbaycan iqtisadiyyatının əsas inkişaf drayverinə çevrilib. Növbəti ildə qeyri-neft sektorunda artım tempinin ümumi iqtisadi artım tempindən təxminən iki dəfə yüksək olacağı proqnozlaşdırılır. İnvestisiyaların təxminən 57 faizinin məhz qeyri-neft sektorunun payına düşəcəyi gözlənilir. Eyni zamanda, qeyri-neft ixracında da artımın davam edəcəyi ehtimal olunur".
Deputat əlavə edib ki, bütün bunlar iqtisadiyyatın şaxələndirilməsi və dayanıqlı inkişafı istiqamətində həyata keçirilən islahatların nəticəsidir: "Cənab Prezidentin rəhbərliyi ilə atılan strateji addımlar bir mənalı şəkildə balanslı, dayanıqlı və inklüziv iqtisadi sistemin formalaşmasına, eləcə də iqtisadi artım tempinin sürətlənməsinə əlverişli şərait yaradır".
Ayhan
15:19 24.12.2025
Oxunuş sayı: 3174
