Prezident İlham Əliyev xalqımızın yaddaşında müdrik liderlik, qətiyyət və uzaqgörən siyasətin rəmzi kimi yer alıb - RƏY

Müstəqil Azərbaycan dövlətinin son onilliklərdə keçdiyi inkişaf yolu birbaşa olaraq Prezident İlham Əliyevin adı və siyasi iradəsi ilə bağlıdır. Onun rəhbərliyi dövründə ölkə təkcə regional deyil, beynəlxalq miqyasda da etibarlı tərəfdaş, söz sahibi olan güclü dövlətə çevrilib. Daxili siyasətdə sabitliyin möhkəmləndirilməsi, iqtisadi islahatların dərinləşdirilməsi, sosial rifahın yüksəldilməsi və dövlət institutlarının gücləndirilməsi əsas prioritetlər kimi ardıcıl şəkildə həyata keçirilib. Xarici siyasətdə isə balanslaşdırılmış, milli maraqlara söykənən və prinsipial mövqe Azərbaycanın suverenliyinin və təhlükəsizliyinin təmin olunmasında həlledici rol oynayıb. Bu gün Prezident İlham Əliyevin siyasi kursu yalnız ötən dövrün nəticələri ilə deyil, həm də gələcəyə yönəlik strateji baxışı ilə səciyyələnir. Xüsusilə də onun doğum gününün yaxınlaşdığı bir zamanda dövlət başçısının keçdiyi siyasi yolun, tarixi qərarlarının və Azərbaycanın taleyində oynadığı rolun dəyərləndirilməsi daha da aktual görünür. Bu, təkcə bir liderin fəaliyyəti haqqında deyil, müasir Azərbaycan dövlətçiliyinin formalaşma mərhələləri haqqında ümumi mənzərə yaratmaq baxımından da mühüm əhəmiyyət daşıyır.

Milli Məclisin deputatı Azər Allahverənov Crossmedia.az-a açıqlamasında prezident İlham Əliyevin siyasəti ilə bağlı fikirlərini bölüşüb:   "Azərbaycanın müasir tarixində dərin iz buraxmış, dövlət müstəqilliyinin möhkəmlənməsi və milli dirçəlişin təmin olunmasında əvəzsiz xidmətlər göstərmiş Prezident İlham Əliyev xalqımızın yaddaşında müdrik liderlik, qətiyyət və uzaqgörən siyasətin rəmzi kimi yer alıb. Onun doğum günü artıq çoxdan sadəcə təqvim hadisəsi olmaqdan çıxaraq, bütün bir dövrün, bir ideyanın güclü, müasir və qalib Azərbaycanın yaranış fəlsəfəsinin rəmzinə çevrilib. Bu gün xalq bu tarixi yalnız bir liderin doğum günü kimi deyil, həm də ölkənin taleyinə yön vermiş, milli inamı bərpa etmiş və dövlətçiliyin dayaqlarını möhkəmləndirmiş bir şəxsiyyətin fəaliyyətinə dərin ehtiram və minnətdarlıqla yad edir. Prezident İlham Əliyevin adı müasir Azərbaycanın inkişafı, sabitliyi və beynəlxalq nüfuzu ilə birbaşa bağlıdır. Onun rəhbərliyi altında ölkəmiz siyasi müdrikliklə iqtisadi gücün, milli dəyərlərlə müasir baxışın və diplomatik çevikliyin qovuşduğu bir modelə çevrilib. Bu gün xalqın yaddaşında qeyd olunan bu əlamətdar gün, əslində, Azərbaycanın dövlətçilik salnaməsində yeni mərhələnin başlanğıc nöqtəsi, müstəqilliyin möhkəm dayaqları üzərində ucalan bir dövlətin rəmzidir".

Deputat əlavə edib ki, 2003-cü ildən etibarən İlham Əliyevin rəhbərliyi ilə Azərbaycan dövlətçiliyi müasir mərhələyə qədəm qoydu: "Ulu Öndər Heydər Əliyevin yaratdığı möhkəm siyasi, iqtisadi və ideoloji təməl bu mərhələnin başlanğıc nöqtəsi oldu. Məhz həmin təməllər üzərində Prezident İlham Əliyev yeni dövrün çağırışlarına cavab verən müasir idarəetmə modelini formalaşdırdı. Heydər Əliyev Azərbaycanın müstəqilliyini qorumaqla yanaşı, dövlətin davamlı inkişafını təmin edəcək sistemin əsasını qoymuşdu. Onun uzaqgörən siyasəti, sabitlik və milli həmrəyliyin bərpası istiqamətində gördüyü işlər müasir Azərbaycan dövlətçiliyinin əsas sütunlarına çevrildi. Prezident İlham Əliyev isə həmin ideyaları yeni dövrün reallıqlarına uyğunlaşdıraraq müstəqil Azərbaycanın inkişaf salnaməsinə yeni səhifələr əlavə etdi. Prezident İlham Əliyevin rəhbərliyi ilə ölkə iqtisadiyyatında keyfiyyətcə yeni model formalaşdırıldı. Dövlətin məqsədi yalnız iqtisadi artım deyil, eyni zamanda insan amilinin önə çəkilməsi, sosial rifahın davamlı yüksəlişi idi. “Regionların sosial-iqtisadi inkişafı” proqramlarının uğurla icrası nəticəsində bölgələrdə minlərlə yeni müəssisə və iş yeri yaradıldı, kəndlər və şəhərlər yenidən quruldu, infrastruktur tamamilə yeniləndi. Neft gəlirlərinin səmərəli idarə olunması sayəsində Azərbaycan neftdən asılı olmayan iqtisadi sistem qura bildi. Bu gün kənd təsərrüfatı, sənaye, turizm, nəqliyyat və texnologiyalar sahəsində əldə olunan nəticələr Azərbaycanın iqtisadi dayanıqlığının və Prezidentin dərin strateji baxışının göstəricisidir".

A.Allahverənov son olaraq bildirib ki, Prezident İlham Əliyevin rəhbərliyi ilə Azərbaycan Ordusu son 20 ildə tamamilə yenidən formalaşdı: "Müasir silah sistemləri, peşəkar hərbi kadrlar və yüksək mənəvi ruh – bütün bunlar 2020-ci ildə əldə edilən tarixi Zəfərin əsaslarını yaratdı. 44 günlük Vətən müharibəsində əldə olunan qələbə Azərbaycan tarixində dönüş nöqtəsi oldu. Bu qələbə təkcə torpaqların azadlığı deyil, həm də ədalətin, milli qürurun və dövlət suverenliyinin bərpası demək idi. Bu gün Qarabağda və Şərqi Zəngəzurda aparılan genişmiqyaslı bərpa və yenidənqurma işləri hava limanlarının, yolların, sənaye parklarının və “ağıllı kəndlərin” inşası Prezidentin uzaqgörən siyasətinin real nəticələridir. Prezident İlham Əliyev bu illər ərzində Azərbaycanı beynəlxalq aləmdə etibarlı tərəfdaş və sabitlik adası kimi tanıtdı. Azərbaycanın Qoşulmama Hərəkatına sədrlik fəaliyyəti, Türk Dövlətləri Təşkilatında fəal rolu, Avropa İttifaqı və BMT çərçivəsində təşəbbüsləri ölkəmizin diplomatik nüfuzunu daha da yüksəltdi. Müstəqil siyasət, balanslı münasibətlər və milli maraqlara söykənən qərarlar İlham Əliyevi qlobal siyasətdə bölgənin aparıcı liderlərindən birinə çevirdi. Prezident İlham Əliyevin siyasətinin mərkəzində daim Azərbaycan vətəndaşı dayanır. Onun rəhbərliyi ilə həyata keçirilən sosial proqramlar, şəhid ailələrinə və müharibə iştirakçılarına göstərilən qayğı, təhsil və səhiyyə sistemində islahatlar, gənclərin və qadınların ictimai həyata fəal cəlbi ölkədə sosial həmrəyliyin möhkəmlənməsinə xidmət edir. Eyni zamanda, Azərbaycan bu gün dünyada multikulturalizm və tolerantlıq nümunəsi kimi tanınır. Mədəniyyət, elm, idman və beynəlxalq humanitar tədbirlər sahəsində əldə olunan nailiyyətlər ölkəmizi regionun mədəni mərkəzinə çevirib. İlham Əliyev Azərbaycanın bu günü və sabahı arasında dayanıqlı körpü yaradan liderdir. Onun siyasi iradəsi, prinsipiallığı və xalqla birliyi dövlətçiliyimizin əsas sütunlarına çevrilib.Azərbaycan bu gün sabitlik, inkişaf və milli həmrəylik məkanıdır. Bu, Prezident İlham Əliyevin 20 ildən artıq davam edən fədakar fəaliyyətinin ən böyük nəticəsidir. Ulu Öndər Heydər Əliyevin dövlətçilik irsinə sadiq qalaraq Azərbaycanı sabitlik, inkişaf və qələbələr yolunda inamla irəlilədən möhtərəm Prezidentimizə möhkəm cansağlığı, uzun ömür və yeni dövlətçilik uğurları arzulayıram".

Ayhan