2026-cı ilin “Şəhərsalma və Memarlıq İli” elan edilməsi yeni layihələrin icrasına şərait yaradacaq - RƏY
Azərbaycan Respublikasında şəhərsalma və memarlıq sahəsinin davamlı inkişafını təmin etmək, müasir urbanizasiya prinsiplərinin tətbiqini genişləndirmək və milli memarlıq irsinin qorunmasını gücləndirmək məqsədilə 2026-cı il Prezidentin müvafiq Sərəncamı ilə “Şəhərsalma və Memarlıq İli” elan edilib. Bu qərar ölkədə şəhər mühitinin keyfiyyətinin yüksəldilməsinə və planlı inkişaf strategiyalarının həyata keçirilməsinə xidmət edir.
2026-cı ilin “Şəhərsalma və Memarlıq İli” elan edilməsi şəhərlərin daha planlı, estetik və rahat yaşayış mühitinə çevrilməsi baxımından mühüm addımdır. Bu təşəbbüs həm müasir memarlıq yanaşmalarının tətbiqinə, həm də milli memarlıq irsinin qorunmasına real töhfə verə bilər. Düşünürəm ki, bu il şəhər mədəniyyətinin və insanların həyat keyfiyyətinin yüksəlməsinə xidmət edəcək.
Milli Məclisin deputatı Arzuxan Əlizadə müvafiq sərəncamın əhəmiyyəti barədə Crossmedia.az-a açıqlama verib.
O bildirib ki, 2026-cı ilin “Şəhərsalma və Memarlıq İli” elan edilməsi Qarabağda və ölkənin digər bölgələrində aparılan bərpa-quruculuq işlərinin daha da genişlənməsinə və yeni layihələrin icrasına təkan verəcək: "Azərbaycan Respublikasının Prezidenti cənab İlham Əliyevin sərəncamı ilə 2026-cı şəhərsalma və Memarlıq ili elan olunub. Əslində, son, xüsusilə də beş il ərzində Qarabağda işğaldan azad olunmuş ərazilərimizdə çox böyük bərpa quruculuq işləri həyata keçirilməkdədir. Hesab edirəm ki, bu sərəncamla həmin işlərin bir qədər də genişləndirilməsi prosesinə şahidlik etmiş olacağıq. Əslində Azərbaycanda daha çox bərpa quruculuq işləri Qarabağla yanaşı, Azərbaycanın digər bölgələrində - paytaxt Bakıda, Gəncədə digər şəhərlərimizdə regionlarımızda. Regionların inkişaf proqramı çərçivəsində bir sıra yeni infrastruktur layihələri həyata keçirilir və Azərbaycan xüsusilə də müstəqilliyini tam olaraq ərazi bütövlüyünü və suverenliyini bərpa edəndən sonra bərpa quruculuq işlərinə daha çox diqqət ayırmağa başlayıb. Paralel olaraq müdafiə xərclərimizi artırmışıq. Qarabağa qayıdışla bağlı proseslərə dövlət büdcəsindən kifayət qədər böyük vəsait də ayrılıb. Amma eyni zamanda da Qarabağı işğal dövrü altında olduğu dönəmdə dağıdılmış ərazilərin yenidən bərpası, insanımızın geriyə qayıdışı, qayıdış konsepsiyasının, Böyük qayıdış konsepsiyasının həyata keçirilməsi prosesi bütövlükdə yeni layihələrin icrasını özlüyündə tələb edir, yeni layihələrin həyata keçirilməsini tələb eləyib və bu kontekstdə də təbii ki, şəhərsalma və memarlıq ili öz növbəsində bu məsələlərə bir qədər də daha çox diqqət ayrılacağından xəbər verir. Qarşıdakı ildə biz bərpa quruculuq işlərimizi davam etdirməklə yanaşı, eyni zamanda sərəncamın, yəni bu ilin ruhundan irəli gələn bir sıra yeniliklərə də imza atılmasına şahidlik edəcəyik".
Ülvi Zahidov
14:48 24.12.2025
Oxunuş sayı: 4370
