Prezident İlham Əliyevin həyata keçirdiyi iqtisadi siyasət Azərbaycanın müstəqilliyini möhkəmləndirən əsas amillərdəndir - RƏY
Bu gün- dekabrın 24-ü Azərbaycan Respublikasının Prezidenti İlham Əliyevin doğum günüdür. İlham Əliyev 2003-cü ildən etibarən ölkəyə rəhbərlik edir və bu dövrdə Azərbaycanın siyasi sabitliyinin möhkəmləndirilməsi, iqtisadi inkişafın sürətləndirilməsi, müstəqil və balanslaşdırılmış xarici siyasətin formalaşdırılması onun fəaliyyətinin əsas istiqamətləri olub. Prezident İlham Əliyevin fəaliyyəti müasir Azərbaycan dövlətçiliyinin möhkəmlənməsində həlledici rol oynayıb. Onun qətiyyətli siyasi iradəsi və strateji baxışı ölkənin həm regional güc kimi mövqeyini gücləndirib, həm də uzunmüddətli sabitliyi təmin edib. Bu siyasət Azərbaycanın milli maraqlarının ardıcıl və prinsipial şəkildə qorunmasına xidmət edir.
Milli Məclisin deputatı Jalə Əliyeva Prezident İlham Əliyevin ölkənin daxili və xarici siyasətindəki rolu barədə Crossmedia.az - a danışıb: "Prezident İlham Əliyevin rəhbərliyi ilə Azərbaycan müasir dövlətçilik modelini formalaşdıraraq güclü iqtisadiyyat, müstəqil siyasət və qlobal miqyasda söz sahibi olan lider ölkəyə çevrilib. Müasir Azərbaycan tarixinin ən mühüm mərhələsi Prezident İlham Əliyevin adı və çoxşaxəli fəaliyyəti ilə sıx bağlıdır. Onun rəhbərliyi altında Azərbaycan müstəqil, güclü və öz gələcəyini özü müəyyən edən bir dövlət kimi formalaşmış, regionda və beynəlxalq aləmdə etibarlı tərəfdaş, qətiyyətli mövqe nümayiş etdirən ölkəyə çevrilmişdir. Prezident İlham Əliyevin siyasi fəaliyyətinin əsasını milli maraqlara sadiqlik, strateji düşüncə, ardıcıl islahatlar və xalqına söykənən idarəetmə modeli təşkil edir. Bu model Azərbaycan dövlətçiliyinin möhkəmlənməsinə, ictimai-siyasi sabitliyin təmin olunmasına və uzunmüddətli inkişaf strategiyasının uğurla reallaşdırılmasına imkan yaratmışdır. Prezident İlham Əliyev Ulu Öndər Heydər Əliyevin müəyyən etdiyi dövlətçilik kursunu müasir çağırışlara uyğun şəkildə davam etdirmiş və onu yeni keyfiyyət mərhələsinə yüksəltmişdir. Güclü dövlət idarəçiliyi, hüquqi islahatlar, institusional inkişaf və effektiv icra mexanizmləri bu siyasətin əsas dayaqları olmuşdur.
Onun rəhbərliyi dövründə dövlət institutlarının fəaliyyəti daha çevik və nəticəyönümlü xarakter almış, qanunun aliliyi və idarəetmədə şəffaflıq prinsipləri möhkəmləndirilmişdir. Cəmiyyətin bütün təbəqələri ilə dialoq, ictimai rəyin nəzərə alınması və vətəndaş məmnunluğunun təmin edilməsi Prezident siyasətinin əsas məqsədlərindən birinə çevrilmişdir".
Parlamentari bildirib ki, Prezident İlham Əliyevin həyata keçirdiyi iqtisadi siyasət Azərbaycanın müstəqilliyini möhkəmləndirən əsas amillərdən biridir: "Enerji sektorunda əldə olunan uğurlar iqtisadiyyatın lokomotivi rolunu oynamaqla yanaşı, qeyri-neft sektorunun inkişafına yönəldilmiş genişmiqyaslı islahatlara möhkəm zəmin yaratmışdır. Sənaye parklarının və aqroparkların yaradılması, sahibkarlığın dəstəklənməsi, ixrac potensialının artırılması, rəqəmsal iqtisadiyyatın inkişafı ölkənin iqtisadi strukturunu diversifikasiya etmişdir. Regionların sosial-iqtisadi inkişaf proqramları çərçivəsində Azərbaycanın ən ucqar kəndlərinə qədər infrastruktur layihələri həyata keçirilmiş, balanslı regional inkişaf təmin olunmuşdur. Prezident İlham Əliyevin fəaliyyətində sosial siyasət xüsusi yer tutur. Əhalinin sosial müdafiəsinin gücləndirilməsi, əməkhaqlarının və pensiyaların artırılması, aztəminatlı ailələrə dövlət dəstəyinin genişləndirilməsi sosial ədalət prinsipinin real tətbiqidir. Şəhid ailələri və qazilərə göstərilən xüsusi diqqət və qayğı, onların mənzil-məişət şəraitinin yaxşılaşdırılması, tibbi və sosial təminatının gücləndirilməsi dövlətin vətəndaşına verdiyi dəyərin bariz nümunəsidir. Təhsil və səhiyyə sahəsində aparılan islahatlar isə insan kapitalının inkişafına yönəlmiş strateji addımlar kimi çıxış edir. Prezident İlham Əliyevin xarici siyasəti müstəqillik, balans və milli maraqlar prinsipinə əsaslanır. Azərbaycan heç bir güc mərkəzindən asılı olmayan, öz mövqeyini açıq və qətiyyətlə ifadə edən dövlət kimi tanınır. Ölkəmizin beynəlxalq təşkilatlarla əməkdaşlığı, regional təhlükəsizlik və enerji layihələrində fəal iştirakı Azərbaycanın geosiyasi əhəmiyyətini artırmışdır. Azərbaycan artıq yalnız enerji ixrac edən ölkə deyil, həm də mühüm nəqliyyat, logistika və diplomatik dialoq mərkəzinə çevrilmişdir".
Həmsöhbətimizin sözlərinə görə, Prezident İlham Əliyevin fəaliyyətinin ən parlaq və tarixi səhifəsi Azərbaycanın ərazi bütövlüyünün və suverenliyinin tam bərpası ilə bağlıdır: "Onun Ali Baş Komandan kimi qətiyyətli rəhbərliyi, siyasi iradəsi və diplomatik ustalığı nəticəsində Azərbaycan xalqı uzun illər gözlədiyi ədalətə qovuşmuşdur. Bu Zəfər yalnız hərbi uğur deyil, eyni zamanda milli birliyin, güclü dövlətin və sarsılmaz liderliyin nəticəsi kimi tarixə düşmüşdür. Azad edilmiş ərazilərdə həyata keçirilən bərpa və quruculuq işləri – yollar, hava limanları, yaşayış məntəqələri, mədəni və dini abidələrin bərpası – gələcəyə hesablanmış strateji baxışın göstəricisidir. Prezident İlham Əliyevin fəaliyyəti müasir Azərbaycan dövlətçiliyinin möhkəmlənməsi, xalqın rifahının yüksəldilməsi və ölkənin beynəlxalq nüfuzunun gücləndirilməsi ilə xarakterizə olunur. Onun rəhbərliyi altında Azərbaycan güclü iqtisadiyyata, müasir orduya, müstəqil siyasətə və sağlam cəmiyyətə malik dövlət kimi inkişaf edir. Bu fəaliyyətin əsasında bir əsas prinsip dayanır: güclü dövlət – güclü xalq – güclü gələcək. Prezident İlham Əliyevlə birlikdə gələcəyə inamla irəlilədiyimiz yol daim açıq və uğurlu olsun".
Ülvi Zahidov
14:40 24.12.2025
Oxunuş sayı: 2979
