Şahramanyan hakimiyyəti zorla ələ keçirmə işi üzrə dindirilib
Ermənistan İstintaq Komitəsi ləğv edilmiş qondarma qurumun “sonuncu başçısı” Samvel Şahramanyanı Baqram Srbazan və digərləri ilə bağlı cinayət işi çərçivəsində şahid qismində dindirməyə çağırıb.
Crossmedia.az xəbər verir ki, dindirilmədən əvvəl Samvel Şahramanyan “Azadlıq Radiosu”na deyib ki, onu nə üçün yenidən çağırdıqlarından xəbərsizdir.
“Biz bilmirik, hansı iş üzrə çağırıblar. Gələcəyik, axırda vəkil sizə izah verəcək”, - deyə Şahramanyan qeyd edib.
Məlumata görə, dindirmə bir saatdan çox davam edib. Daha sonra erməni vəkil Rafayel Changiryan “Azadlıq Radiosu”na deyib ki, dindirmə həqiqətən də Tavus yeparxiyasının keçmiş rəhbəri ilə bağlı iş çərçivəsində olub, lakin onlar istintaq sirrini qorumaq barədə imza atdıqları üçün detalları açıqlaya bilmirlər. O yalnız qeyd edib ki, dindirmədən sonra Şahramanyanın şahid statusu dəyişməyib.
Məlumata görə, söhbət terrorçuluq və hakimiyyəti zorla ələ keçirmə ittihamından gedir. İş çərçivəsində arxiyepiskop Baqram Qalstanyan və onun 17 tərəfdarı təqsirləndirilir. İstintaq bu işin bir hissəsini ayıraraq 4 ay əvvəl məhkəməyə göndərib, lakin əsas iş üzrə istintaq davam edir və Şahramanyandan da məhz bu çərçivədə suallar soruşulub.
18:21 04.12.2025
Oxunuş sayı: 1670
