Şübhə sənədində Mindiçlə bağlı epizodda Zelenskinin adı da keçir
Ukrayna Milli Korrupsiyaya qarşı Mübarizə Bürosu tərəfindən hazırlanmış və deputat Aleksey Qonçarenko ilə jurnalist Vladimir Boyko tərəfindən dərc edilən şübhə sənədində iş adamı Timur Mindiçə qarşı irəli sürülən ittihamlarla yanaşı, Ukrayna Prezidenti Vladimir Zelenskinin də adı qeyd olunur.
Crossmedia.az-ın xarici mediaya istinadən verdiyi məlumata görə, sənəddə göstərilir ki, Mindiç Zelenskiyə yaxınlığına və yüksək vəzifəli dövlət rəsmiləri ilə əlaqələrinə arxalanaraq hərbi vəziyyət dövründə qanunsuz varlanma sxemi qurub.
Milli Korrupsiyaya qarşı Mübarizə Bürosunun məlumatına görə, Mindiçin “qanunsuz fəaliyyəti” həmin dövrdə müdafiə naziri vəzifəsini icra edən Rustem Umerov və energetika naziri German Qaluşenkonun iştirakı ilə həyata keçirilib. Bu isə ona müdafiə və energetika sahələrindəki maliyyə axınlarına çıxış imkanı yaradıb.
Mindiçə cinayətkar təşkilat yaratmaq, nazirlərə qanunsuz təsir göstərmək, maliyyə vəsaitlərinə nəzarəti ələ almaq, pulların yuyulması kimi ittihamlar irəli sürülür.
Qeyd edək ki, Ukraynanın Milli Korrupsiyaya qarşı Mübarizə Bürosu daha əvvəl Mindiçin “texniki fiqur” olduğunu, əsas benefisiarların isə “siyasi iradəyə malik şəxslər” olduğunu bildirmişdi.
Nigar Yahyazadə
15:15 19.11.2025
Oxunuş sayı: 998
