Netanyahu BMT-nin qərarını alqışlayıb: İsrail sülhə və sabitliyə hazırdır
İsrailin baş naziri Benyamin Netanyahu BMT-nin qəbul etdiyi qərarı yüksək qiymətləndirib və bunun regionun sabitləşdirilməsi istiqamətində mühüm addımlara yol açdığını bildirib.
“İsrail bu qərarı alqışlayır və ABŞ-a, həmçinin təşəbbüsə qoşulan digər ölkələrə təşəkkür edir. Biz yaxın vaxtlarda bütün qaçırılmış israillilərin cəsədlərinin geri qaytarılacağını gözləyirik — bu, ailələr və İsrail dövlətinin vətəndaşları qarşısında mənəvi borcdur”, — deyə o bildirib.
Crossmedia.az xarici mətbuata istinadən xəbər verir ki, İsrail baş naziri əlavə edib ki, eyni zamanda İsrail əsas mərhələnin — Qəzza sektorunun silahsızlaşdırılması və HƏMAS rejiminin ləğvi prosesinə başlamağı planlaşdırır.
“İsrail yalnız öz qonşularına deyil, bütün Yaxın Şərqə sülh əli uzadır. Biz əməkdaşlığa, yeni reallığın – region ölkələrinin inkişaf etdiyi və çiçəkləndiyi, terror və aqressiyanın yer almadığı reallığın qurulmasına hazırıq. Bu gün yenidən bütün qonşularımıza səslənirik: İsraillə münasibətləri normallaşdırın, bizə qoşulun ki, birlikdə HƏMAS-ı və onun tərəfdarlarını aradan qaldıraq və sabitlik, təhlükəsizlik və qarşılıqlı hörmətə əsaslanan gələcəyin bünövrəsini qoyaq”, — deyə Netanyahu bəyan edib.
Pərvin Hacıyeva
14:55 18.11.2025
Oxunuş sayı: 5038
