Bugünkü Azərbaycan ulu öndərin yenidən qurduğu Azərbaycanın birbaşa varisidir — Deputat
14 iyul 1969-cu il Azərbaycan tarixində yeni bir mərhələnin başlanğıcıdır. Bu tarixdə Heydər Əliyevin Azərbaycan Kommunist Partiyası Mərkəzi Komitəsinin birinci katibi seçilməsi ilə ölkənin sosial, iqtisadi və siyasi həyatında mühüm dəyişikliklərə yol açan proseslərə start verildi. Azərbaycanın müxtəlif sahələrində müşahidə olunan durğunluq yerini dinamik inkişafa verdi, milli kimliyin qorunması və azərbaycançılıq ideyasının gücləndirilməsi istiqamətində ciddi addımlar atıldı. 14 iyul həm də Azərbaycanın gələcək müstəqilliyinə aparan ideoloji və intellektual təməllərin qoyulduğu bir gündür.
Mövzu ilə bağlı Crossmedia.az-a açıqlama verən Milli Məclisin deputatı Hikmət Babaoğlu bildirib ki, əgər biz tarixə qısa ekskursiya etsək və 1969-cu ilin 14 iyulu ilə 2025-ci ilin 14 iyulu arasında əlaqə qurmağa çalışsaq, görəcəyik ki, burada birbaşa strateji vektor var:
“Bu vektor Azərbaycan dövlətçiliyi tarixində böyük dövlət xadimi Heydər Əliyevin imzasıdır. Bu gün bizə qələbələr gətirən milli özünüdərk, milli-mənəvi mühit, siyasi dəyərlər sistemi, iqtisadiyyatımızın əsasında duran bir çox qlobal, mühüm layihələrin həyata keçirilməsi, nəticə etibarilə sovet dövrü Azərbaycanında müstəqil Azərbaycanın təməllərinə xidmət edəcək miqyasda qurulmuşdu. Ona görə də düşünürəm ki, həm Bakının kosmopolit Bakıdan milli Bakıya çevrilməsi, həm də Azərbaycanın neft sənayesi olmaqla bərabər, dövrün müasir texnoloji vasitələr istehsal edən sənaye ölkəsinə çevrilməsi — o cümlədən Azərbaycanda radio, büllur, soyuducu, maşınqayırma, gəmi təmiri zavodlarının tikilməsi, Bakı Dərin Özüllər Zavodunun əsasının qoyulması — müstəqil Azərbaycanın yeni infrastrukturu və iqtisadi əsaslarının formalaşması üçün mühüm zəmin rolunu oynayıb. II hakimiyyəti dövründə böyük dövlət xadimi, ulu öndər Heydər Əliyev bütün bu resursları yeni müstəqil dövlətimizin inkişafı üçün səfərbər etməyi bacarıb. Nəticə göz qabağındadır. Onun təyin etdiyi konstitusion idarəetmə üsulu və yeni neft strategiyası Azərbaycanın bu günkü zəfərini təyin edib. Bizi bugünkü qələbəmizə gətirib çıxardıb. Ona görə də düşünürəm ki, bugünkü Azərbaycan 1969-cu ildə ulu öndər Heydər Əliyevin yenidən qurmağa başladığı Azərbaycanın birbaşa varisidir”.
Nəzrin Salmanova
21:04 14.07.2025
Oxunuş sayı: 875
