Kim Çen In: “Rusiyaya Ukrayna müharibəsində qeyd-şərtsiz dəstək veririk”
Şimali Koreya lideri Kim Çen In ölkəsinin Ukraynaya qarşı Rusiyanın bütün addımlarını qeyd-şərtsiz dəstəklədiyini bir daha bəyan edib.
Crossmedia.az xəbər verir ki, Şimali Koreya Mərkəzi Xəbər Agentliyinin (KCNA) yaydığı xəbərə görə, Kim Çen In bu fikirlərini ölkəyə ikinci strateji təmaslar çərçivəsində səfər edən Rusiya xarici işlər naziri Sergey Lavrovla görüşündə səsləndirib.
Kim, Şimali Koreya ilə Rusiya arasında imzalanmış sazişə istinad edərək, Ukrayna böhranının əsas səbəblərinə qarşı Moskvanın atdığı bütün addımları “qeyd-şərtsiz dəstəkləməyə və təşviq etməyə hazır olduqlarını” bildirib. O, həmçinin hər iki ölkənin strateji məsələlərdə ortaq mövqedə olduğunu vurğulayıb və ikitərəfli əlaqələrin inkişafına dair qətiyyətini bir daha ifadə edib.
Digər tərəfdən, Şimali Koreya Müdafiə Nazirliyi Cənubi Koreya, ABŞ və Yaponiyanın birgə keçirdiyi hava təlimlərinə sərt reaksiya verib. Nazirliyin bəyanatında bu tip fəaliyyətlərin “Koreya yarımadası və ətraf bölgələrdə hərbi gərginliyi artıran əsas təhlükə faktoru” olduğu bildirilib.
Cənubi Koreya xəbər agentliyi “Yonhap” isə Cənubi Koreya Müdafiə Kəşfiyyat Agentliyinə (DIA) istinadən yaydığı məlumatda, Şimali Koreyanın indiyədək Rusiyaya təxminən 28 min konteyner silah və artilleriya mərmisi göndərdiyini iddia edib.
Mədinə Cəlilova
20:20 13.07.2025
Oxunuş sayı: 8746
