“Dağıntı məqsəd deyil, vasitə deyil”: İsrailin Qəzzadakı dağıntı strategiyası ifşa olundu
İsrailin nüfuzlu “Haaretz” qəzeti, İsrail ordusunun (IDF) Qəzza zolağında həyata keçirdiyi genişmiqyaslı dağıntıların “hərbi zərurət” adı altında həyata keçirilən texniki tədbirlər deyil, əslində planlı və məqsədli bir strategiya olduğunu ortaya çıxarıb.
Crossmedia.az xəbər verir ki, qəzetin yayımladığı redaksiya məqaləsində bildirilir ki, IDF-nin texnika operatorlarına ödəniş mexanizmi bu yıxım kampaniyasının əsl məqsədini ifşa edir.
İsrail ordusu, rəsmi bəynatlarında ev və tikililərin yalnız hərbi risk daşıdığı və ya manevr imkanlarını məhdudlaşdırdığı hallarda dağıdıldığını bildirir. Lakin “Haaretz”in araşdırması bu iddiaları şübhə altına alır: Ordu, Qəzzada üç mərtəbəyə qədər olan binaların dağıdılması üçün operatorlara 2 500 şekel (təxminən 750 ABŞ dolları), daha hündür tikililər üçün isə bundan ikiqat artıq ödəniş edir. Bu struktur, operatorları daha çox bina yıxmağa təşviq edən açıq bir mükafat sisteminə çevrilib.
Qəzetin yazdığına görə, bu ödənişlər gündəlik və ya aylıq əsasda həyata keçirilir və Qəzzada çalışan texnika operatorları İsrail daxilindəki bənzər işlərdən qat-qat artıq qazanc əldə edirlər. Bəzi operatorların aylıq qazancı 30 min şekelə (təxminən 9 min dollar) qədər çatır.
“Haaretz”, bu sistemin yalnız iqtisadi deyil, ideoloji motivasiyalara da əsaslandığını yazır. Qəzzada fəaliyyət göstərən operatorlarla aparılan müsahibələr göstərib ki, bir çoxları bu işi intiqam hissi ilə və ya ideoloji bağlılıqla yerinə yetirir. Onların arasında həm mülki işçilər, həm də orduya məxsus ehtiyatda olan hərbçilər yer alır.
Nəticədə, Baş nazir Benyamin Netanyahunun Həmasla atəşkəs danışıqları apardığı bir vaxtda, digər tərəfdən Qəzzanın illərlə yaşanmaz hala gətirilməsi prosesi sistematik şəkildə davam etdirilir. “Haaretz”in qənaətinə görə, “Bu dağıntı əməliyyatları hərbi ehtiyacın yan təsiri deyil, əslində başlıca məqsəddir”.
Qəzet İsrail rəhbərliyinə bu təcrübəyə dərhal son qoyulması çağırışı da edib.
Mədinə Cəlilova
19:00 13.07.2025
Oxunuş sayı: 836
