12 türkiyəli hərbi qulluqçunun şəhid olduğu mağarada nə baş verib?
Türkiyə Milli Müdafiə Nazirliyi "Pençe-Kilit" əməliyyatı bölgəsində 12 hərbi qulluqçunun şəhid olduğu hadisə ilə bağlı ətraflı məlumat paylaşıb.
Crossmedia.az xəbər verir ki, açıqlamada hadisənin gedişatı, aparılan axtarış işləri və iddialara dair qiymətləndirmələr yer alıb.
"İraqın şimalında 2019-cu ildə başladılan "Pençe" Seriyası Əməliyyatları çərçivəsində ümumilikdə 3 min 765 mağara/sığınacaq aşkarlanıb, axtarış və məhv etmə əməliyyatları uğurla həyata keçirilib və bu günə qədər baş verən bu hadisədən başqa hər hansı bir qazdan təsirlənmə halı yaşanmayıb. Bundan əlavə, əməliyyat sahələrində mağara, sığınacaq və tunellərin aşkarlanması, məhv edilməsi fəaliyyətləri davam etdirildiyi kimi, digər tərəfdən də müqəddəs şəhidlərimizin nəşlərinə çatmaq üçün axtarış işləri fasiləsiz şəkildə davam etdirilib", - deyə açıqlamada qeyd edilib.
Qaz sızması şəxsi heyəti təsirə məruz qoydu
Açıqlamada deyilir ki, iyulun 6-da baş verən hadisə zamanı mağaraya daxil olmadan öncə kəşfiyyat iti ilə yenidən yoxlama aparılıb, heç bir mənfi hal aşkarlanmadıqdan sonra 3 qrup halında (6+4+2 nəfərlik) ümumilikdə 12 nəfər mağaraya daxil olub: "İkinci mərtəbədə aparılan axtarış zamanı öndə irəliləyən heyətdə büdrəmə və huşunu itirmə halları müşahidə olunub, ən arxada yerləşən rabitə və təhlükəsizlik heyəti (2 nəfər) çölə çıxaraq yardım istəyib".
Bildirilib ki, çöldə olan 5 nəfər personal yardım çağırışından sonra dərhal mağaraya daxil olub, bu şəxslərin bir hissəsində də büdrəmə və huşsuzluq halı müşahidə olunub.
"Ardınca çöldə olan 12 nəfərimiz ikili qruplar halında mağaraya daxil olub və qazdan təsirlənən personalı çölə çıxarmağa çalışıb. Qazdan təsirlənən personalın hamısı (ön sıradakı 7 silah yoldaşımız istisna olmaqla) axtarış qrupundakı əməkdaşlarımızın fədakarlığı ilə çölə çıxarılıb və dərhal hava yolu ilə xəstəxanaya çatdırılıb, görülən bütün tibbi müdaxilələrə baxmayaraq, 5 qəhrəman silah yoldaşımız şəhid olub", - deyə açıqlamada vurğulanıb. (ordu.az)
15:18 12.07.2025
Oxunuş sayı: 900
