Kürd separatçıları İrana qarşı savaşa hazır olduqlarını bəyan etdilər
İsrailin İrana qarşı hərbi əməliyyatları bölgədə separatçı kürd qruplarını hərəkətə gətirib.
Crossmedia.az xarici mediaya istinadən bildirir ki, Kürdistan Azadlıq Partiyasının (PAK) lideri Hüseyn Yəzdanpənah Ərbildə keçirdiyi brifinqdə İsrailin zərbələrini dəstəklədiklərini və bu istiqamətdə hərbi əməkdaşlığa hazır olduqlarını bildirib.
“İrana qarşı hücumda iştirak etməyə hazırıq. Bu bölgədə öz hakimiyyətimizi qurmaq üçün nə lazımdırsa, edəcəyik”, – deyə PAK lideri vurğulayıb.
O, həmçinin kürd xalqının milli kimliyindən və hüquqlarından heç zaman imtina etməyəcəyini qeyd edib: “Mübarizəmizi davam etdirəcəyik və əlimizdən gələni edəcəyik.”
Qeyd edək ki, PAK partiyası Ərbildə hakim olan Barzani klanı və İraqın şimalındakı kürd hərbi qüvvələri – Peşmərgə ilə sıx əlaqələrə malikdir. PAK əvvəllər İŞİD-ə qarşı koalisiya çərçivəsində döyüşlərdə iştirak edib.
Ekspertlər bildirirlər ki, kürd silahlı qrupları İrandakı digər müxalifət hərəkatları ilə əməkdaşlıq potensialına malik olsalar da, bu əməkdaşlıq həmişə uğurlu alınmır. Belə ki, İranın daxili müxalifətinin əksəriyyəti kürdlər və azərbaycanlılar da daxil olmaqla etnik qrupların muxtariyyət tələblərinə qarşı çıxır. Rəsmi Tehran isə uzun illərdir müxtəlif xalqlar arasında milli ədavəti körükləməkdə ittiham olunur.
Zəhra Ağayeva
20:16 18.06.2025
Oxunuş sayı: 583
