Rusiyaya qarşı yeni addım: Britaniya qırıcıları nüvə bombası daşıyacaq
Rusiya-Ukrayna müharibəsi üç ildən artıqdır davam edərkən, Avropa ölkələri Moskvanın yaratdığı “təhlükə”yə qarşı yeni tədbirlər görməyə davam edir.
Crossmedia.az xəbər verir ki, “The Times” qəzetinin məlumatına görə, Böyük Britaniya Rusiya ilə qarşıdurmada çəkindiriciliyini artırmaq üçün taktiki nüvə silahı daşıya bilən döyüş təyyarələri almağı planlaşdırır.
ABŞ istehsalı olan bu qırıcıların, Soyuq Müharibədən bəri Böyük Britaniyada müdafiə sahəsində həyata keçiriləcək “ən böyük inkişaf” olacağı bildirilir.
Qəzetin yazdığına görə, Baş nazir və Leyboristlər Partiyasının lideri Keir Starmerin hökuməti bu məsələ ilə bağlı “çox həssas danışıqlar” aparır. Müdafiə naziri John Healey və Silahlı Qüvvələrin baş komandanı Tony Radakin ABŞ-dən ənənəvi bombalara nisbətən daha az gücə malik olan B61 tipli nüvə bombalarını daşıya bilən təyyarələrin alınmasını istəyir. Starmerin də bu planı dəstəklədiyi və ABŞ Müdafiə Nazirliyi (Pentaqon) ilə danışıqların aparıldığı güman edilir.
Məlumata görə, baş nazir Starmer bazar ertəsi ölkədəki bir gəmiqayırma zavodundan strateji müdafiə dəyərləndirməsini başlatmağa hazırlaşır. Bu qiymətləndirmənin, NATO-nun Avropadakı ortaq nüvə çəkindiriciliyinə Böyük Britaniyanın töhfəsinin artırılmasını əhatə edəcəyi gözlənilir.
Müdafiə naziri Healey “The Sunday Times” qəzetinə verdiyi açıqlamada ABŞ ilə danışıqlar barədə şərh verməkdən imtina edib, lakin Britaniyanın “yeni təhlükə dövrünə” uyğunlaşmalı olduğunu bildirib. “Dünya açıq şəkildə daha təhlükəli hal alıb. Nüvə riskləri artır. Hazırda Soyuq Müharibədən bu yana ilk dəfə dövlətlərarası münaqişə riski ciddi şəkildə yüksəlib”, – deyə Healey bildirib.
Bu qiymətləndirmə həm də Britaniyanın “müharibə öncəsi səviyyəyə” gətirilməsini, yenidən silahlanmaya dair tövsiyələrin verilməsini və “daima işlək vəziyyətdə” olan müdafiə sənayesinin yenidən qurulmasını nəzərdə tutulur. Böyük Britaniya bu məqsədlə Lockheed Martin şirkətinin F-35A Lightning tipli döyüş təyyarələrini almağı nəzərdən keçirir. Almaniya Hərbi Hava Qüvvələri bu təyyarələrdən sifariş verib. F-35A modelləri, adi F-35-lərlə müqayisədə daha uzun məsafə qət edə bilir və B61 termonüvə yerçəkmə bombası daşımaq imkanına malikdir.
Qeyd olunub ki, digər təyyarə modelləri də qiymətləndirmə mərhələsindədir.
Mədinə Cəlilova
23:40 02.06.2025
Oxunuş sayı: 8003
