Alman hökumətində İsrail gərginliyi: Koalisiya ortağından nazirlə bağlı tənqid
Almaniyanın xarici işlər naziri Johann Wadephulun İsrailə silah ixracının Qəzzada beynəlxalq humanitar hüququn mümkün pozuntuları fonunda yenidən dəyərləndiriləcəyinə dair açıqlaması yeni qurulan Xristian Birlik (CDU-CSU) və Sosial Demokrat Partiyası (SPD) koalisiya hökumətində fikir ayrılığına səbəb olub.
Xristian Sosial Birlik (CSU) partiyasının Bavariya əyalət qrupunun rəhbəri Aleksandr Hoffman, həmçinin CDU üzvü olan Wadephulun bu açıqlamasını tənqid edib.
Crossmedia.az xarici mətbuata istinadən xəbər verir ki, üç gün əvvəl Almaniya mətbuatına danışan Wadephul, “Qəzza zolağında baş verənlərin beynəlxalq humanitar hüquqa uyğun olub olmadığını araşdırırıq. Əlavə silah tədarükünün olub-olmayacağı bu dəyərləndirməyə əsaslanacaq”, - deyə bildirmişdi. Süddeutsche Zeitung qəzetinə verdiyi müsahibədə isə silah ixracatının qismən dayandırılmasının mümkün olub-olmadığına dair suala “Sözlər bunu ehtiva edir” cavabını verib.
CSU-lu Hoffman isə Der Spiegel dərgisinə verdiyi açıqlamada, Wadephulun bu sözlərini tənqid edib. O, “İnsan dostlarını tənqid edə bilər, lakin onlara sanksiya tətbiq edə bilməz. Bu, Almaniya dövlətinin İsrailə qarşı olan dövlət siyasətinin (Staatsräson) sonu olardı. Bu, CSU üçün qəbuledilməzdir”,- deyə bildirib.
Hoffman əlavə edib ki, 7 oktyabr 2023 tarixindən bu yana yaşanan hadisələr, Almaniyanın İsrailin yanında olma mövqeyindən imtina etməsi ilə nəticələnməməlidir.
Digər tərəfdən, CDU-lu Almaniya Kansleri Fridrix Mers də ötən bazar ertəsi verdiyi açıqlamada, İsraili beynəlxalq humanitar hüququ pozmaqda ittiham etmişdi. Mers İsrailin Qəzzaya hücumlarının məqsədini artıq anlamadığını qeyd etmiş, sərhədlərin aşılması halında beynəlxalq humanitar hüququn pozulmuş olacağını bildirmişdi.
Mədinə Cəlilova
23:20 02.06.2025
Oxunuş sayı: 8285
