Şimali Koreya batan hərbi gəmisinə hava şarları yerləşdirdi - ekspertlərdən fərqli rəylər
Şimali Koreyanın mayın 21-də uğursuz başa çatan suya buraxılışından sonra zədələnmiş hərbi gəmisinə hava şarlarına bənzər naməlum obyektlər yerləşdirdiyi peyk görüntülərində əks olunub. 5 min tonluq müasir hərbi gəmi hazırda qismən suyun altında və yan vəziyyətdə qalıb.
Crossmedia.az xarici mediaya istinadən bildirir ki, ekspertlər bu obyektlərin gəmini yenidən düz vəziyyətə gətirmək və ya pilotsuz uçuş aparatlarından qorumaq məqsədi ilə istifadə oluna biləcəyini qeyd ediblər. Hadisə Şimali Koreyanın hərbi-dəniz qüvvələrini modernləşdirmə planlarında mühüm yer tutan gəminin suya buraxılması zamanı baş verib. Ölkənin rəsmi xəbər agentliyinin məlumatına görə, buraxılış mexanizmində baş verən nasazlıq səbəbindən gəminin arxa hissəsi vaxtından əvvəl suya düşüb və gövdəyə ciddi ziyan dəyib.
Hadisəni şəxsən izləyən Şimali Koreya lideri Kim Çen In bunu “cinayət” adlandırıb və gəminin mümkün qədər tez təmir olunmasını əmr edib. O, gəminin iyun ayının sonlarında keçiriləcək Koreya Fəhlə Partiyasının plenumuna qədər tam bərpa olunmasını milli şərəf məsələsi kimi dəyərləndirib. Artıq hadisəyə görə məsuliyyət daşıyan şəxslər müəyyənləşdirilib, o cümlədən gəmiqayırma zavodunun baş mühəndisi də daxil olmaqla dörd nəfər saxlanılıb.
Cənubi Koreya parlamentinin üzvü və hərbi analitik Yu Yonq-veon bildirib ki, gəmidəki hava şarları su basmasının qarşısını almaq məqsədi ilə quraşdırılmış ola bilər. ABŞ Hərbi Dəniz Qüvvələrinin təqaüddə olan kapitanı Karl Şuster isə bu şarların həm də aşağı və orta səviyyəli pilotsuz uçuş aparatlarının görüntülərini çətinləşdirmək üçün istifadə oluna biləcəyini istisna etməyib.
Beynəlxalq Strateji Araşdırmalar İnstitutunun dəniz qüvvələri üzrə eksperti Nik Çaylds qeyd edib ki, gəmini bu üsulla suyun üzərinə çıxarmağa çalışmaq vəziyyəti daha da ağırlaşdıra bilər. Müdafiə tədqiqatları üzrə ixtisaslaşan analitik Deker Eveles isə gəminin yarı suyun içində, yarı isə quruda olması səbəbindən bərpa işlərini daha da mürəkkəbləşdirdiyini vurğulayıb.
Ekspertlər bildirirlər ki, gəmini xilas etmək üçün onu parçalara ayırmaq və yalnız yararlı hissələri qoruyub saxlamaq ehtimalı da var. Bu, həm təmir işlərini asanlaşdırmaq, həm də limanı gəmidən təmizləmək üçün ən real çıxış yolu hesab edilir.
Fatimə Nəbiyeva
18:00 31.05.2025
Oxunuş sayı: 1611
