Makron: Ukraynanı tərk etmək Qərbin Çinlə bağlı etibarını sarsıdır
Fransa prezidenti Emmanuel Makron ABŞ və Hind-Sakit okean ölkələrinə xəbərdarlıq edib ki, Çinlə mümkün münaqişəyə fokuslanmaq üçün Ukraynanı diqqətdən kənarda qoymasınlar. Onun fikrincə, bu, təhlükəli ikili standartın yaranmasına və Qərbin qlobal etibarının itirilməsinə səbəb ola bilər.
Makron bildirib ki, Hind-Sakit okeanda daha sərt və çəkindirici mövqe tutmaq, dünyanın — xüsusilə də Qərbin — Ukrayna kimi kritik məsələlərə yanaşmasından asılıdır.
Crossmedia.az xarici mediaya istinadən bildirir ki, Makron bu açıqlamaları Sinqapurda keçirilən və regionun ən böyük təhlükəsizlik forumu olan Shangri-La Dialoqunda səsləndirib. Forum Rusiyanın Ukraynaya genişmiqyaslı işğalının yaratdığı qlobal narahatlıqlar fonunda təşkil olunub. Makronun çıxışını dinləyənlər arasında ABŞ-ın müdafiə naziri Pit Heqset də olub.
Makron bildirib: “Əgər Rusiyaya qlobal nizamın reaksiyası olmadan Ukrayna ərazisinin bir hissəsini almağa icazə verilərsə, Tayvanda nələr baş verəcəyini necə izah edəcəksiniz? Həmin gün bir şey baş versə, nə edəcəksiniz?”
Makronun xəbərdarlığı ABŞ-ın Avropadakı bəzi qoşunlarını Hind-Sakit okean regionuna köçürmək planları ilə eyni vaxta təsadüf edir. O bildirib ki, Ukraynanı diqqətdən kənarda qoymaq Vaşinqtonun Çin və Tayvan arasında mümkün münaqişəyə dair etibarını sarsıdar.
Hazırda ABŞ və Çin arasında gərginlik artır. Vaşinqton Çini üçrəqəmli tariflərlə hədələyir, Tayvana isə 32 faiz tarif tətbiq olunması gözlənilir. Çin isə Tayvanı öz ərazisi hesab edir və oraya hərbi təzyiqləri artırır — o cümlədən adanın cənub-şərqində yerləşdirilmiş təyyarədaşıyan gəmi ilə
ABŞ bölgədə “azad və açıq Hind-Sakit okean siyasəti” çərçivəsində Tayvan boğazı və Cənubi Çin dənizində mütəmadi hərbi fəaliyyət həyata keçirir.
Zəhra Ağayeva
11:30 31.05.2025
Oxunuş sayı: 7284
