NYT: Ukraynanın Rusiya ilə bağlı memorandumu ifşa olunub
Ukraynanın Rusiya ilə müharibənin dayandırılması barədə hazırladığı memorandumda atəşkəsin quruda, havada və dənizdə tam şəkildə təmin olunması tələb olunur. Sənədə əsasən, bu prosesə beynəlxalq tərəfdaşlar nəzarət etməlidir.
Crossmedia.az UNIAN-a istinadən xəbər verir ki, bu barədə adının açıqlanmasını istəməyən yüksək vəzifəli ukraynalı məmur danışıb.
Qeyd olunub ki, bu həftə ABŞ prezidentinin xüsusi nümayəndəsi Kit Kelloq Ukraynanın hazırladığı memorandumun ABŞ-yə təqdim edildiyini təsdiqləyib. Lakin Rusiyadan hələ də cavab sənədi daxil olmayıb. Kelloq bildirib ki, Ukrayna tərəfi danışıqlardan imtina etməməlidir, hətta Rusiya sənədi təqdim etməsə belə.
“Mən həmişə deyirəm – belə bəyanatlar verməyin. Əgər ortaya çıxmazsınızsa, bu, sizin ciddiyə alınmamağınıza səbəb olacaq. Ciddisinizsə, bunu göstərməlisiniz”, – deyə Kelloq qeyd edib.
O, Ukrayna memorandumundakı 22 maddənin kifayət qədər məntiqli və qəbulolunan olduğunu bildirib.
Bundan əlavə , Ukraynanın xarici işlər naziri Andrey Sibiqa may n 30-u Rusiyanı danışıqları ləngitməkdə ittiham edib. Onun sözlərinə görə, Rusiya hələ də öz şərtlərini əks etdirən memorandumu təqdim etməyib.
Belə ki, Ukrayna növbəti danışıqlar mərhələsi üçün Rusiyanın təqdim edəcəyi sənədi görmək istəyir. Moskva həmin mərhələnin 2 iyunda İstanbulda keçirilməsini təklif edib.
"Kiyevin əsas məqsədi əvvəlcə atəşkəsə nail olmaq, daha sonra isə genişmiqyaslı sülh sazişi üzrə danışıqlara başlamaqdır. Amma Rusiya atəşkəslə maraqlanmadığını göstərir", – deyə məqalədə qeyd olunur.
Prezident Volodimir Zelenski isə bildirib ki, Rusiya hələ də vəd etdiyi memorandumu təqdim etməyib. Onun sözlərinə görə, Moskva müharibəni uzadır və beynəlxalq ictimaiyyəti aldatmağa çalışır.
“Moskva ilə sözlə danışmaq mümkün deyil. Sənəd vəd olunmuşdu, amma hələ də nə Ukraynaya, nə tərəfdaşlara, nə də danışıqlara ev sahibliyi edən Türkiyəyə təqdim olunmayıb”, – Zelenski bildirib.
Fatimə Məmmədova
04:00 31.05.2025
Oxunuş sayı: 1195
