İran Avstriyanın nüvə ittihamlarına cavab verdi: “Məntiqsiz və əsassızdır”
İran xarici işlər nazirliyi Avstriya kəşfiyyatının İranın uzun mənzilli, nüvə başlığı daşıya bilən ballistik raket arsenalını artırdığı iddialarına sərt reaksiya verib.
Crossmedia.az İran mətbuatına istinadən xəbər verir ki, nazirliyin sözçüsü İsmayıl Bəkayi yayımladığı bəyanatda bu iddianı “əsassız və təmelsiz” adlandıraraq, Avstriya kəşfiyyatının məsuliyyətsiz və təhrikedici yanaşmasını pislədiklərini bildirib. İran rəsmisi bu səbəbdən Avstriya hökumətindən rəsmi açıqlama tələb etdiklərini vurğulayıb.
Bəkayi qeyd edib ki, İran Nüvə Silahlarının Yayılmasının Qarşısının Alınması haqqında nüqaviləyə (NPT) tərəfdir və ölkənin nüvə proqramı Beynəlxalq Atom Enerjisi Agentliyi (UAEA) tərəfindən ciddi şəkildə nəzarət altındadır. Onun sözlərinə görə, Avstriya kəşfiyyatının bu cəhdi agentliyin nüfuzuna zərbə vurur.
İran rəsmisi Avstriya kəşfiyyatının açıqlamasını “İran əleyhinə media mühiti yaratmaq məqsədli bir təşəbbüs” kimi qiymətləndirib. Bəkayi, bu iddiaların heç bir sənədə və etibarlı mənbəyə əsaslanmadığını deyib: “Sionist rejimin kütləvi qırğın silahları ilə silahlanmasına göz yuman, bu soyqırımı həyata keçirən, işğalçı rejimi dəstəkləməklə regionun bu silahlardan təmizlənməsinə əngəl olan Avstriya və bəzi Avropa ölkələrindən fərqli olaraq, İran nüvə və digər kütləvi qırğın silahlarına qəti şəkildə qarşıdır. İran, Yaxın Şərqin bu silahlardan tamamilə təmizlənməsi ideyasının qəti tərəfdarı və öncüsüdür”.
Avstriya kəşfiyyatının yaydığı hesabatda, İranın nüvə silahı hazırlamaq istiqamətində proqramının irəli mərhələyə çatdığı iddia edilmiş və İranın nüvə başlıqlarını uzaq məsafəli hədəflərə çatdırmaq gücündə ballistik raketlərə malik olduğu irəli sürülmüşdü. Həmçinin Tehran rəhbərliyinin bu tip raketlərin sayını artırdığına dair sübutların əldə olunduğu bildirilmişdi.
Mədinə Cəlilova
01:00 31.05.2025
Oxunuş sayı: 6871
