Makron: "Fələstin dövlətini tanımaq əxlaqi bir vəzifədir"
Fransa Prezidenti Emmanuel Makron Sinqapur səfəri zamanı dünya gündəminə dair açıqlamalar verib.
Crossmedia.az xarici KİV-ə istinadən xəbər verir ki, o, müəyyən şərtlərlə Fələstin dövlətini tanımağın “yalnız əxlaqi bir vəzifə deyil, eyni zamanda siyasi bir zərurət” olduğunu bildirib.
ABŞ-nin vasitəçiliyi ilə İsrail və HƏMAS arasında atəşkəs və girov mübadiləsinə dair danışıqlar davam edərkən, Makron İsrailin Qəzzaya qarşı hücumlarına da toxunub. O, İsrailin Qəzzadakı humanitar vəziyyətə adekvat reaksiya verməməsi halında Avropa ölkələrinin İsrailə qarşı “kollektiv yanaşmalarını sərtləşdirməli” olduğunu vurğulayıb. Makron, aclıq və qıtlığın dərinləşdiyi Qəzzada “növbəti saatlar və günlər ərzində” konkret addımların atılmasının vacibliyini qeyd edib.
Makron Rusiya-Ukrayna müharibəsinə də toxunaraq, ABŞ Prezidenti Donald Trampın rəhbərlik etdiyi administrasiyanın, Ukraynada atəşkəslə bağlı yubanmağa davam edən Rusiyaya necə reaksiya verəcəyi baxımından “inandırıcılıq testi” ilə üz-üzə olduğunu söyləyib.
Fransa Prezidenti əlavə edib ki, Avropa ölkələri Rusiyaya qarşı yeni sanksiyalara hazırdır və ABŞ administrasiyası da eyni addımları atmağa hazır olduğunu təsdiqləməlidir.
Makron həmçinin bildirib ki, yaxın vaxtlarda Səudiyyə Ərəbistanı ilə birlikdə Nyu-Yorkda Qəzzə ilə bağlı konfrans keçiriləcək. O, iki dövlətli həll yoluna aparan prosesi canlandırmağın və həm Fələstin dövlətinin, həm də İsrailin regionda təhlükəsizlik və sülh şəraitində yaşamaq hüququnun tanınmasının vacibliyini vurğulayıb.
Mədinə Cəlilova
00:00 31.05.2025
Oxunuş sayı: 9222
