Ər-Riyaddan Tehrana xəbərdarlıq iddiası: “ABŞ ilə razılıq olmazsa İsrailin hücum riski yaranır”
Səudiyyə Ərəbistanının İran rəhbərliyinə ABŞ ilə nüvə danışıqları ilə bağlı xəbərdarlıq mesajı göndərdiyi iddia edilib.
Crossmedia.az xəbər verir ki, “Reuters” agentliyinin iki Körfəz ölkəsi rəsmisinə və iki iranlı yetkiliyə istinadən yaydığı məlumata görə, Səudiyyə Ərəbistanının müdafiə naziri şahzadə Xalid bin Salman ötən ay Tehranda iranlı rəsmilərlə qapalı görüşlər keçirib və ABŞ Prezidenti Donald Trampın nüvə sazişinə dair danışıqlar təklifinin ciddiyə alınması barədə “kəskin mesaj” verib.
Onun sözlərinə görə, bu təklifin qəbul edilməsi mümkün İsrail hücumlarının qarşısını almaq baxımından vacibdir.
Məlumata görə, 17 aprel tarixində Tehran Prezident Sarayında keçirilən görüşdə İran Prezidenti Məsud Pəzeşkiyan, Baş Qərargah rəisi Məhəmməd Baqeri və xarici işlər naziri Abbas Əraqçi iştirak ediblər. Görüş zamanı şahzadə Xalid bin Salman İranın ali dini lideri Ayətullah Əli Xameneiyə çatdırılmaq üçün Kral Salman bin Əbdüləzizin xüsusi mesajını təqdim edib.
Prins Xalid Trampın danışıqlarda səbrinin tükəndiyini və onun komandası ilə tez bir razılaşma əldə edilmədiyi təqdirdə diplomatik imkanların
bağlanacağını bildirib. O, ABŞ ilə razılıq əldə etməyin mümkün bir İsrail hücumu riskindən daha yaxşı seçim olduğunu vurğulayıb. Nazir həmçinin qeyd edib ki, İsrailin hazırda Qəzza və Livanda həyata keçirdiyi hərbi əməliyyatlar bölgədə gərginliyin daha da artmasına yol aça bilər və region daha çox zorakılıq dalğasına tab gətirə bilməz.
Reuters-ın sorğularına İran və Səudiyyə Ərəbistanından rəsmi cavab verilməyib.
Qeyd olunur ki, Səudiyyə vəliəhd şahzadəsi Məhəmməd bin Salmanın kiçik qardaşı olan şahzadə Xalid bin Salman son 20 ildən artıq müddət ərzində İranı ziyarət edən ilk yüksək səviyyəli Səudiyyə kral ailəsi üzvü olub.
Digər tərəfdən, ABŞ və İran son həftələrdə Oman və İtaliyada Oman vasitəçiliyi ilə bir neçə dolayı nüvə danışıqları aparıblar. Prezident Pəzeşkiyan bu görüşlərdə Qərbin sanksiyalarını aradan qaldırmaq və iqtisadi təzyiqləri azaltmaq məqsədilə razılaşma əldə etmək niyyətini bildirib.
İranlı mənbələrin verdiyi məlumata görə, İran rəsmiləri eyni zamanda Trampın danışıqlara qarşı “qeyri-müəyyən və proqnozlaşdırılması çətin” yanaşmasından narahat olduqlarını ifadə ediblər. Prezident Pəzeşkiyan danışıqlara açıq olduqlarını desə də, yalnız Tramp razılaşma istəyir deyə uran zənginləşdirmə proqramından imtina etməyəcəklərini də vurğulayıb.
Mədinə Cəlilova
23:15 30.05.2025
Oxunuş sayı: 7649
