ABŞ nümayəndəsi: “Rusiyanın NATO ilə bağlı narahatlığı əsaslıdır”
ABŞ Prezidenti Donald Trampın Ukrayna üzrə xüsusi nümayəndəsi Kit Kelloq NATO-nun şərqə doğru genişlənməsi ilə bağlı Rusiyanın narahatlığını haqlı hesab etdiyini bildirib. ABŞ mətbuatına verdiyi açıqlamada Kellogg qeyd edib ki, “Rusiyanın narahatlığı tamamilə əsaslıdır”.
Crossmedia.az xəbər verir ki, Kelloq ABC televiziyasına verdiyi müsahibədə bildirib ki, ABŞ rəhbərliyi Ukraynanın NATO-ya üzvlüyünün gündəmdə olmadığını əvvəldən bəyan edib: “Ukraynanın NATO-ya daxil olması məsələsinin gündəmdə olmadığını demişik. Bu fikri yalnız biz səsləndirmirik, NATO daxilində də bu məsələyə qarşı çıxacaq dörd ölkənin adını çəkə bilərəm. Üzvlük üçün NATO-nun 32 üzv dövlətinin hamısının razılığı tələb olunur. Rusiya bu məsələni gündəmə gətirməkdə haqlıdır”.
Kelloq əlavə edib ki, Rusiya yalnız Ukrayna deyil, eyni zamanda Gürcüstan və Moldova ilə bağlı da narahatlıqlarını dilə gətirir. Onun sözlərinə görə, ABŞ-nin NATO-nun genişlənməsinə dair mövqeyi Prezident Trampın qərarları ilə müəyyən olunur.
Trampın nümayəndəsi həmçinin bildirib ki, 2 iyun tarixində Rusiyanın təşəbbüsü ilə İstanbulda keçirilməsi planlaşdırılan danışıqlarda əsas məqsəd Rusiya və Ukrayna nümayəndə heyətlərinin hazırladığı iki təklif layihəsinin bir sənəddə birləşdirilməsi olacaq. Kelloq qeyd edib ki, Almaniya, Fransa və Böyük Britaniyadan milli təhlükəsizlik müşavirləri də bu prosesi ABŞ-la birlikdə müzakirə edəcək.
Kellogg müsahibəsində Trampın Rusiya Prezidenti Vladimir Putində “bir qədər məntiqsizlik” müşahidə etdiyini və ABŞ Prezidentinin bu səbəbdən narazı olduğunu bildirib. O, Ukraynada hazırkı müharibə nəticəsində ölən və yaralananların ümumi sayının təxminən 1,2 milyon olduğunu qeyd edərək, bunun “sənaye miqyasında aparılan bir müharibə” olduğunu vurğulayıb.
Qeyd edək ki, Prezident Tramp ötən günlərdə Rusiyanın Ukrayna şəhərlərinə səbəbsiz hücumlarını sərt şəkildə qınamış və Ukraynanın danışıqlarda iştirak etməsinin vacibliyini bildirmişdi.
Mədinə Cəlilova
22:45 30.05.2025
Oxunuş sayı: 9422
