Ərəb Dövlətləri Liqası İsrailə təzyiq göstərilməsinə çağırdı
Bağdad şəhərində keçirilən 34-cü Ərəb Dövlətləri Liqasının (ƏDL) sammiti mühüm siyasi çağırışlarla yadda qalıb. Sammitin yekununda qəbul olunan bəyanatda İsrailin Suriyanın ərazisinə etdiyi hücumlar kəskin şəkildə pislənib və beynəlxalq ictimaiyyət bu məsələdə daha qətiyyətli mövqe nümayiş etdirməyə çağırılıb.
ƏDL üzvü olan dövlətlərin rəhbərləri Suriyanın ərazi bütövlüyünü və suverenliyini bir daha dəstəklədiklərini ifadə ediblər. Bəyanatda Suriyanın daxili işlərinə istənilən müdaxilə qəti şəkildə rədd edilib, ölkədə hərtərəfli və inklüziv siyasi keçid prosesinin davam etdirilməsinin vacibliyi vurğulanıb. Sammit iştirakçıları Suriyanın bütün ictimai təbəqələrinin qatıldığı milli dialoq konfransının keçirilməsinin zəruriliyini qeyd ediblər.
Eyni zamanda, sammit çərçivəsində ABŞ Prezidenti Donald Trampın Suriyaya qarşı tətbiq olunan sanksiyaların ləğvi ilə bağlı qərarı alqışlanıb və bu addım regionda sabitlik və iqtisadi dirçəliş baxımından mühüm əhəmiyyət kəsb etdiyi bildirilib.
Sammitdə diqqət çəkən digər bir məsələ isə Fələstində, xüsusilə də Qəzza zolağında baş verən humanitar böhran olub. ƏDL liderləri döyüş əməliyyatlarının dərhal dayandırılmasına, bölgəyə təcili humanitar yardımın çatdırılmasına və İsrailə siyasi-diplomatik təzyiqlərin artırılmasına çağırıblar. Bu kontekstdə Fələstin xalqının hüquqlarının qorunması və bölgədə ədalətli sülhün təmin olunmasının vacibliyi vurğulanıb.
Qeyd edək ki, 34-cü sammit ƏDL tarixində önəmli hadisələrdən biri olub. İlk dəfə olaraq Dəməşqdəki yeni administrasiyanın rəsmi nümayəndəsi də bu ali toplantıda iştirak edib. Bu, Suriyanın regional siyasi arenaya qayıdışının əlaməti kimi dəyərləndirilir.
Sammitin yekunları, Yaxın Şərqdə sülh və sabitliyin bərqərar olunması istiqamətində regional həmrəyliyin və birgə fəaliyyətin vacibliyini bir daha nümayiş etdirdi.
Nigar Yahyazadə
13:00 18.05.2025
Oxunuş sayı: 8638
