FBI-nın keçmiş rəhbərindən mübahisəli Tramp paylaşımı: 4 rəqəmlə “təhdid” etdi
ABŞ Prezidenti Donald Trampın ilk prezidentlik dövründə FBI direktoru vəzifəsindən azad etdiyi Ceyms Komi, sosial mediada paylaşdığı 8647 rəqəmi ilə Trampı təhdid etməkdə ittiham olunub.
Crossmedia.az ABŞ mediasına istinadən xəbər verir ki, Komi Instagram hesabında dəniz kənarında balıqqulaqları ilə yazılmış “8647” rəqəmini göstərən bir foto yayımlayıb və “Dəniz kənarında gəzişərkən maraqlı balıqqulağı düzümü” qeydi ilə paylaşım edib. Lakin bu paylaşım Tramp tərəfdarları tərəfindən birmənalı qarşılanmayıb və “gizli təhdid” kimi şərh edilib.
Keçmiş FBI rəhbəri, gələn reaksiyalardan sonra paylaşımı silərək bunun sadəcə siyasi məna daşıyan bir mesaj olduğunu düşündüyünü bildirib. Komi, bəzi insanların bu rəqəmi zorakılıqla əlaqələndirdiyini əvvəlcədən düşünmədiyini deyərək, “Bu heç ağlıma gəlməmişdi. Amma zorakılığın hər növünə qarşıyam buna görə də paylaşımı sildim”, - deyə açıqlama verib.
Xatırladaq ki, Tramp 2017-ci ildə Komini FBI rəhbəri vəzifəsindən azad etmişdi. Həmin dövrdə Komi, Trampın seçki kampaniyasına Rusiyanın mümkün müdaxiləsi ilə bağlı araşdırma aparırdı.
Mədinə Cəlilova
16:40 16.05.2025
Oxunuş sayı: 9104
